وزیرِاعظم: پولیو کے خاتمے کیلئے حکومت اور ادارے پرعزم ہیں

اسلام آباد: وزیرِاعظم محمد شہباز شریف نے کہا ہے کہ پاکستان سے پولیو کے مکمل خاتمے کے لیے شعبۂ صحت کی ٹیم، پولیو ورکرز اور تمام متعلقہ ادارے پوری طرح پرعزم ہیں۔

روٹری انٹرنیشنل کا تعاون قابلِ تعریف

وزیرِاعظم نے کہا کہ حکومت پاکستان روٹری انٹرنیشنل اور دیگر بین الاقوامی اداروں کی شکر گزار ہے جو اس موذی مرض کے خاتمے کے لیے بھرپور تعاون فراہم کر رہے ہیں۔ انہوں نے کہا کہ پولیو کے خاتمے کی راہ میں چیلنجز ضرور ہیں، مگر عزم اور محنت کے ذریعے ہم اپنے بچوں کے مستقبل کو محفوظ بنائیں گے۔

پولیو ورکرز کو خراجِ تحسین

وزیرِاعظم نے اعتراف کیا کہ انسداد پولیو مہمات میں فرنٹ لائن پر کام کرنے والے پولیو ورکرز کا کردار نہایت اہم اور قابلِ تحسین ہے۔ انہوں نے کہا کہ مشکلات موجود ہیں لیکن پولیو کا خاتمہ ناممکن نہیں۔

روٹری انٹرنیشنل وفد کی وزیرِاعظم سے ملاقات

وزیرِاعظم شہباز شریف سے روٹری انٹرنیشنل فاؤنڈیشن کے صدر فرانسیسکو اریزو (Francesco Arezzo) نے وفد کے ہمراہ ملاقات کی۔ اس موقع پر وفاقی وزیرِ صحت سید مصطفی کمال، وزیرِاعظم کی خصوصی نمائندہ برائے انسداد پولیو عائشہ رضا فاروق اور اعلیٰ حکام بھی موجود تھے۔

پاکستان کے اقدامات کی تعریف

روٹری انٹرنیشنل کے وفد نے حکومت کے انسداد پولیو اقدامات کی تعریف کی اور امید ظاہر کی کہ وزیرِاعظم کی قیادت اور خصوصی توجہ سے پاکستان جلد پولیو فری ملک بن جائے گا۔ وفد نے حکومت کی معاونت جاری رکھنے کے عزم کا اعادہ کیا اور بتایا کہ گزشتہ برس روٹری انٹرنیشنل نے پاکستان میں انسداد پولیو کے لیے 500 ملین ڈالر خرچ کیے، جبکہ رواں برس بھی خطیر رقم خرچ کرنے کا منصوبہ ہے۔