وزیراعلیٰ پنجاب مریم نواز شریف کا پی ڈی ایم اے ہیڈ آفس میں ڈپٹی کمشنرز سے خطاب

پنجاب کی تاریخ کے سب سے بڑے ریسکیو آپریشن کی کامیابی، لاکھوں افراد اور مویشی محفوظ بنائے گئے

لاہور: وزیراعلیٰ پنجاب مریم نواز شریف نے پی ڈی ایم اے ہیڈ آفس میں صوبے کے ڈپٹی کمشنرز کے اجلاس سے خطاب کرتے ہوئے کہا کہ پنجاب نے حالیہ خطرناک سیلابی صورتحال کا کامیابی سے مقابلہ کیا ہے۔ وزیراعلیٰ نے پنجاب کی تاریخ کے سب سے بڑے ریسکیو آپریشن کی کامیابی پر متعلقہ اداروں کو مبارکباد پیش کی۔

مریم نواز شریف نے کہا کہ کئی دہائیوں بعد اتنی خطرناک صورتحال کا سامنا کرنا پڑا، لیکن مسلسل بارشوں اور بھارت کی جانب سے پانی چھوڑے جانے کے باوجود آبادی کا بروقت انخلا یقینی بنایا گیا۔ اس کی بدولت نہ صرف ہزاروں انسانی جانیں بچائی گئیں بلکہ ساڑھے چار لاکھ مویشی بھی محفوظ بنائے گئے۔

وزیراعلیٰ نے کہا:

• "یہ ثابت ہوا کہ پنجاب میں مختلف ڈیپارٹمنٹس نہیں بلکہ ایک ٹیم کام کررہی ہے۔”
• "ریلیف اور ریسکیو آپریشن میں تمام اداروں کی شبانہ روز کاوشیں قابل تحسین ہیں۔”
• "پوری توجہ ریسکیو اور ریلیف پر رکھی جائے، عوام کو خود جا کر ریلیف فراہم کریں۔”
• "سیلاب میں پھنسے افراد اور جانوروں کے بروقت انخلا کی وجہ سے نقصانات نہ ہونے کے برابر ہیں۔”

انہوں نے مزید ہدایت دی کہ:

• خطرے والے اضلاع میں پیشگی اقدامات یقینی بنائے جائیں۔
• عوام کو ریلیف کی فراہمی میں سخت رویہ اختیار نہ کیا جائے بلکہ خدمت اور محبت سے پیش آیا جائے۔
• ٹینٹ ویلجز میں مرد و خواتین کے لئے الگ عمارتوں، ٹوائلٹس اور اسکولوں کی عمارتوں کا استعمال کیا جائے۔
• مویشیوں کو منتقل کرنے کے لئے کشتیوں کے بجائے بیڑوں کا انتظام کیا جائے۔
• کمزور اور بوسیدہ عمارتوں سے بارشوں کے دوران بروقت انخلا کرایا جائے۔
• سیلاب میں بہنے والے جانوروں کو اصل مالکان تک پہنچانے کے لئے خصوصی سیل بنایا جائے۔

وزیراعلیٰ نے پاکستان آرمی کا خصوصی شکریہ ادا کرتے ہوئے کہا کہ آرمی کے جوانوں نے مشکل وقت میں عوام کے ساتھ کھڑے ہو کر شاندار کردار ادا کیا ہے۔ "میری بہت سی دعائیں پاکستان آرمی کے ساتھ ہیں، اللہ تعالیٰ انہیں سلامت رکھے۔”

انہوں نے ڈی سی نارووال کی کاوشوں کو بھی سراہا جنہوں نے کرتارپور گردوارہ اور جنم استھان میں پانی کی نکاسی اور صفائی کے حوالے سے بہترین کام کیا۔ اس پر دنیا بھر کی سکھ برادری کی جانب سے شکریہ کے پیغامات موصول ہو رہے ہیں۔

مریم نواز شریف نے مزید کہا کہ:

• پنجاب کے 22 اضلاع میں سیف سٹی کیمرے کام کررہے ہیں۔
• تینوں دریاؤں کے کنارے آباد شہروں کی ڈرون فوٹیج مہیا کی جائے۔
• عوام کو خشک راشن کی فراہمی اور ڈی واٹرنگ کے لئے پمپس کی تنصیب یقینی بنائی جائے۔
• پولیس اور ریسکیورز کی کاوشیں لائق تحسین ہیں جنہوں نے نہ صرف لوگوں بلکہ بہتے ہوئے جانوروں کو بھی ریسکیو کیا۔

اجلاس کے اختتام پر وزیراعلیٰ نے کہا:
"یہ پنجاب ہے جہاں وزیراعلیٰ عوام کو جوابدہ ہے۔ محنت کریں، عوام کی خدمت کریں اور نیک نامی کمائیں۔”