وزیراعلیٰ بلوچستان میر سرفراز بگٹی کی ہدایت پر صوبائی وزیر صحت بخت محمد کاکڑ فوری طور پر اسپتال پہنچ گئے اور تمام طبی امدادی سرگرمیوں کی براہِ راست نگرانی شروع کر دی۔
صوبائی وزیر صحت کے مطابق دھماکے کے بعد تمام اسپتالوں میں ایمرجنسی نافذ کر دی گئی ہے۔ ٹراما سینٹر سول اسپتال میں اب تک پانچ لاشیں اور پندرہ زخمی منتقل کیے جا چکے ہیں۔
انہوں نے بتایا کہ ڈاکٹروں اور طبی عملے کو فوری طور پر ڈیوٹی پر طلب کرلیا گیا ہے جبکہ ریجنل بلڈ سینٹر کو فعال کر کے خون کی فراہمی کے لیے ہنگامی اقدامات جاری ہیں۔
بخت محمد کاکڑ کا کہنا تھا کہ زخمیوں کو بہترین طبی سہولیات فراہم کی جا رہی ہیں، تمام اسپتالوں کے آپریشن تھیٹر اور آئی سی یوز کو ہائی الرٹ کر دیا گیا ہے۔
مزید برآں، ایمبولینس سروسز اور پیرا میڈیکل اسٹاف کو بھی الرٹ رکھا گیا ہے تاکہ کسی بھی ہنگامی صورتحال میں فوری رسپانس دیا جا سکے۔
صوبائی وزیر صحت نے زخمیوں سے ملاقات کی اور اہل خانہ سے اظہار یکجہتی کرتے ہوئے ہر ممکن تعاون کی یقین دہانی کرائی۔
