پنجاب نے ایک مرتبہ پھر سب سے آگے رہنے کی روایت برقرار رکھی ہے۔ وزیراعلیٰ پنجاب مریم نواز شریف کی ہدایت پر صوبے میں پاکستان کی پہلی کاؤنٹر نارکوٹکس فورس (سی این ایف)کا قیام عمل میں لایا گیا ہے۔ پنجاب وہ پہلا صوبہ ہے جس نے پہلے مرحلے میں پانچ مختلف سپیشلائزڈ فورسز قائم کرکے ادارہ جاتی اور آئینی اصلاحات کی نئی تاریخ رقم کر دی ہے۔2018ء میں 18ویں آئینی ترمیم کے بعد صوبوں کو سپیشلائزڈ فورسز بنانے کا مینڈیٹ ملا تھا اور اب پنجاب نے اس مینڈیٹ کو عملی جامہ پہنایا ہے۔ صوبے میں اس سے پہلے وائلڈ لائف فورس، انوائرمنٹ فورس، فارسٹری فورس اور پیرا فورس قائم کی جا چکی ہیں اور اب منشیات کے سدباب کے لیے پہلی صوبائی کاؤنٹر نارکوٹکس فورس کے قیام کا اعزاز بھی پنجاب کو حاصل ہوا ہے۔
وزیراعلیٰ مریم نواز شریف نے لاہور میں کاؤنٹر نارکوٹکس فورس کی پاسنگ آؤٹ پریڈ میں شرکت کرکے افسران و جوانوں سے حلف لیا۔ وزیراعلیٰ نے فورس کو پرچم سپرد کرتے ہوئے کہا کہ یہ فورس منشیات کے خلاف ایک مؤثر اور پروفیشنل ادارے کے طور پر کام کرے گی۔ فورس میں 866 بھرتیاں کی گئی ہیں اور ہر ڈویژن میں ڈائریکٹوریٹ قائم کیا گیا ہے تاکہ انسداد منشیات کی کارروائیوں کو مزید مربوط بنایا جا سکے۔پنجاب حکومت کے ان اقدامات سے نہ صرف صوبے میں ادارہ جاتی اصلاحات کی نئی تاریخ رقم ہوئی ہے بلکہ نوجوان نسل کو منشیات کی لعنت سے بچانے کے لیے ایک مضبوط نظام بھی تشکیل دیا گیا ہے۔ وزیراعلیٰ مریم نواز شریف کے وژن کے مطابق پنجاب کاؤنٹر نارکوٹکس فورس ایک ایسا ادارہ ثابت ہوگا جو معاشرے کو منشیات سے پاک کرنے میں کلیدی کردار ادا کرے گا۔
وزیراعلیٰ مریم نواز شریف نے پنجاب کاؤنٹر نارکوٹکس فورس کے افتتاحی تقریب سے خطاب کرتے ہوئے کہا کہ پنجاب کاؤنٹر نارکوٹکس فورس کے جوانوں کو دیکھ کر بے حد مسرت ہوئی۔ کاؤنٹر نارکوٹکس فورس کی صورت میں پاکستان اورپنجاب کا مستقبل محفوظ نظر آرہا ہے۔ وزیراعلیٰ مریم نواز شریف نے کہا کہ سی این ایف فور س کی باڈی لینگویج سے نظر آتا ہے کہ پنجاب سے منشیات کا جلد خاتمہ ہوجائے گا۔ پاکستان کی آبادی 65فیصد نوجوانوں پر مشتمل ہے جنہیں منشیات سے بچانا ہے۔ آبادی تب ہی ملک کی طاقت بنتی ہے جب منشیات سے دور ہوکر تعلیم اور صحت پر توجہ دے۔پنجاب کاؤنٹر نارکوٹکس فورس کے قیام پر بہت خوش ہوں۔ وزیراعلیٰ مریم نواز شریف نے کہا کہ قلیل مدت میں مضبوط انسداد منشیات فورس کا قیام لائق تحسین ہے۔ اینٹی نارکوٹکس کے ذریعے جلد پورے پنجاب سے منشیات کا خاتمہ ہوگا۔ وزیراعلیٰ کا حلف اٹھایا تو والدین کی طرف سے درخواستیں آئیں کہ ہمارے بچوں کو منشیات سے بچایا جائے۔ المیہ ہے کہ منشیات ہر گلی، ہر محلے،ہر یوینورسٹیوں اور ہر سکول تک بھی پہنچ رہی ہیں۔ وزیراعلیٰ مریم نواز شریف نے کہا کہ منشیات کے کنٹرول کے لئے ایک سپیشلائزڈ
فورس کا قیام نا گزیر تھا۔ پنجاب کاؤنٹر نارکوٹکس فورس میں بہترین لوگوں کو سو فیصد میرٹ پر سیلکٹ کیا گیا ہے۔ پنجاب کے تمام اضلاع میں بہت جلد تمام اضلاع میں سی این ایف فنکشنل ہو جائے گی۔ پنجاب کاؤنٹر نارکوٹکس فورس کے لئے 12 ہزار درخواستیں موصول ہوئیں جن میں سے 850 جوان و افسران سلیکٹ ہوے۔ سی این ایف کا حصہ بننے والے تمام افسران اور جوانوں اور انکے والدین کو مبارکباد دیتی ہوں۔وزیراعلیٰ مریم نواز شریف نے کہا کہ جیسے ہر بیماری کا علاج پینا ڈول سے نہیں ہوتا اسی طرح جرم کا خاتمہ ایک ہی فورس سے نہیں ہو سکتا۔ بڑی آبادی کے مسائل کے حل کے لئے ایک سپیشلائزڈ ڈیپارٹمنٹس کی ضرورت تھی
۔پنجاب میں کوئی بھی مشکلات آتیں ہیں تو کمشنر اور ڈپٹی کمشنرز کو کہا جاتا ہے جس پر وہ تمام کام چھوڑ کر ایک کام کی طرف ہو جاتے ہیں۔ مہنگائی، ذخیرہ اندوزی، تجاوزات اور قبضہ مافیا کے خلاف پیرا جیسا ادارہ قائم کیا ہے۔ پنجاب میں ہر مسئلے کے خاتمے کے لیے سپیشلائزڈ فورسز قائم کررہے ہیں۔پنجاب پولیس میں ایک سپیشلائزڈ کرائم کنٹرول ڈیپارٹمنٹ نے چند ہفتوں میں کرائم پر کنٹرول کیا ہے۔ سی سی ڈی کی وجہ سے کر یمینل معافیاں مانگ رہے اور مساجد میں اعلانات کررہے ہیں۔سی سی ڈی کی بدولت پورے پنجاب میں کرائم کی شرح نیچے جارہی ہے۔
بعض اضلاع میں روزمرہ ہونے والے کرائم بہت کم ہوگئے ہیں۔ بڑی آبادی میں جرائم کو کنٹرول کرنے کیلئے سپیشلائزڈ ڈیپارٹمنٹ کی اشد ضرورت تھی۔ وزیراعلیٰ مریم نواز شریف نے کہا کہ پنجاب کاؤنٹر نارکوٹکس فورس گلی محلے اور شہروں کو منشیات پاک کریں گے۔ کسی خاندان میں ایک بھی منشیات کا عادی جوان پورے خاندان کے لئے مشکلات کا باعث بنتا ہے۔ پرامید ہوں کہ پنجاب کاؤنٹر نارکوٹکس فورس پوری ایمانداری سے اپنی ذمہ داریاں ادا کرے گی۔ پنجاب کاؤنٹر نارکوٹکس فورس کے جوان گلی، محلوں، ڈسٹرکٹ، شہر اور پورے صوبے سے منشیات کے زہر کو نکال باہر پھنکیں۔ وزیراعلیٰ مریم نواز شریف نے پنجاب کاؤنٹر نارکوٹکس فورس کے جوانوں کو لالچ اور کمزوری نہ د کھانے کی ہدایت بھی کی۔ پنجاب کاؤنٹر نارکوٹکس فورس نے آنے والے نسلوں کو بچانا ہے۔ وزیراعلیٰ مریم نواز شریف نے کہا کہ پرامید ہوں اور دعاگو ہوں کہ پنجاب کاؤنٹر نارکوٹکس فورس اپنے ملک اور پنجاب کا فخر بنے گی۔اب پنجاب میں مسائل پر مصلحت نہیں ہوگی بلکہ حل ہوگا سی این ایف کے کندھوں پر نسل کو بچانے کی بھاری ذمہ داری عائد ہے
ڈیرہ غازی خان ڈویژن میں کمشنر اشفاق احمد چوہدری اور ڈپٹی کمشنر محمد عثمان خالد کی قیادت میں انسداد منشیات کے لیے عملی اقدامات جاری ہیں۔ ضلعی انتظامیہ نے تعلیمی اداروں اور مختلف مقامات پر آگاہی مہم کو فروغ دیا ہے۔ سکولوں اور کالجوں میں سیمینارز اور آگاہی واکس کے ذریعے نوجوانوں کو منشیات کے نقصانات سے آگاہ کیا جا رہا ہے۔ڈپٹی کمشنر محمد عثمان خالد کی ہدایت پر ہیلتھ اور پولیس ڈپارٹمنٹ کے ساتھ مل کر کارروائیاں بھی کی گئیں جن کے دوران نشہ آور اشیاء کی غیر قانونی فروخت روکنے کے لیے کئی کامیاب چھاپے مارے گئے۔ کمشنر اشفاق احمد چوہدری اور ڈپٹی کمشنر محمد عثمان خالد کا کہنا تھا کہ کاؤنٹر نارکوٹکس فورس کی تشکیل کے بعد ڈویژن کی سطح پر کارروائیاں مزید مربوط اور تیز تر ہوں گی۔
