لاہور : وزیراعلیٰ پنجاب مریم نواز شریف کی زیر صدارت خصوصی اجلاس میں گندم، آٹا اور روٹی کے نرخ برقرار رکھنے کے لیے سخت اقدامات کا فیصلہ کیا گیا۔ اجلاس میں فیڈ ملوں میں گندم کے استعمال پر پابندی اور صوبے بھر میں دفعہ 144 نافذ کرنے کا فیصلہ بھی کیا گیا۔

وزیراعلیٰ مریم نواز نے واضح ہدایات جاری کرتے ہوئے کہا کہ روٹی کا نرخ 14 روپے اور 20 کلو آٹے کے تھیلے کا نرخ 1810 روپے سے زیادہ ہرگز نہیں ہونا چاہیے۔ سیلاب کی آڑ میں آٹے اور روٹی کے نرخ بڑھانے والوں کے خلاف فوری ایکشن ہوگا۔

اجلاس میں فیصلہ کیا گیا کہ پیرا کے ایس ڈی اوز کو گندم کی ذخیرہ اندوزی روکنے کے لیے خصوصی اختیارات دیے جائیں گے جبکہ ذخیرہ اندوزی کے خلاف سخت ترین قانونی کارروائی عمل میں لائی جائے گی۔ اس کے ساتھ ساتھ پرائس کنٹرول مجسٹریٹس کو فوری طور پر متحرک کر دیا گیا ہے۔

وزیراعلیٰ نے کہا کہ:

“سیلاب کی آڑ میں آٹے اور روٹی کے نرخ بڑھانے کی ہرگز اجازت نہیں دیں گے، گندم کی ذخیرہ اندوزی عوام سے دشمنی کے مترادف ہے۔”