لیہ :عید میلاد النبی ﷺ کے موقع پر میلاد گراؤنڈ میں عظیم الشان اور مرکزی محفل عشق و عقیدت کے ساتھ منعقد ہوئی۔ میلاد گراؤنڈ کو ’’آمدِ مصطفی مرحبا‘‘ کے بینرز اور دیدہ زیب جھنڈیوں سے سجایا گیا۔ محفل میں پانچ ہزار نشستوں کا اہتمام کیا گیا تاہم عاشقانِ مصطفی ﷺ کے والہانہ جذبے کے باعث کرسیاں کم پڑ گئیں۔
نعت رسول مقبول ﷺ کی صداؤں سے حاضرین کے دل عشقِ محمدی سے سرشار ہوگئے اور فضا ’’یا رسول اللہ ﷺ‘‘ کی صداؤں سے گونج اُٹھی۔ محفل میں ضلع بھر سے عاشقانِ رسول نے جوش و خروش کے ساتھ شرکت کی۔
تقریب میں معروف مذہبی شخصیت پیر سید سبط الحسنین شاہ گیلانی نے خصوصی شرکت کی جبکہ ایڈیشنل ڈپٹی کمشنرز محمد شاہد ملک، شبیر احمد ڈوگر، سابق ممبران اسمبلی سید ثقلین شاہ بخاری و سید رفاقت علی گیلانی، اسسٹنٹ کمشنر حارث حمید خان، ڈی ایس پی صدر عمران خورشید، ضلعی صدر مسلم لیگ ن مہر اسلم سمراء، سی او ایم راشد عزیز غزنوی، صدر انجمن تاجران محمد اظہر ہانس، چیئرمین حاجی تنویر احمد خان، صدر پریس کلب محسن عدیل چوہدری، صدر اپیکا شعیب جیلانی دھول اور سماجی شخصیت مہر طفیل لوہانچ سمیت دیگر شخصیات موجود تھیں۔
تقریب کا آغاز تلاوت کلام پاک، نعت خوانی، قصیدہ بردہ شریف، پرچم کشائی اور قومی ترانے سے کیا گیا۔
تقریب سے خطاب کرتے ہوئے سابق ایم این اے سید ثقلین شاہ بخاری نے کہا کہ حضور ﷺ کی ولادت سے کائنات میں نور پھیل گیا اور اندھیروں کا خاتمہ ہوا۔ آج امت مسلمہ کے لیے لازم ہے کہ سیرتِ طیبہ کو اپنی عملی زندگی کا حصہ بنائے تاکہ دنیا و آخرت میں کامیابی حاصل ہو۔
ایڈیشنل ڈپٹی کمشنر ریونیو محمد شاہد ملک نے کہا کہ نبی کریم ﷺ کی ذات پوری انسانیت کے لیے مشعلِ راہ ہے۔ سیرت النبی ﷺ ہمیں امن، اخوت، خدمت خلق اور ایثار کا درس دیتی ہے، جو دنیا میں قیامِ امن اور ترقی کی ضمانت ہیں۔
سابق ایم پی اے سید رفاقت علی گیلانی نے کہا کہ حضور ﷺ کی تعلیمات پر عمل کر کے ہی ہم اپنی ذاتی، سماجی اور قومی زندگی میں کامیاب ہو سکتے ہیں۔ مفتی احمد رضا اعظمی نے کہا کہ سیرت النبی ﷺ ہمیں محبت، برداشت اور انصاف کا پیغام دیتی ہے۔
آخر میں پیر سید سبط الحسنین شاہ گیلانی نے ملکی سلامتی، وطن عزیز کی حفاظت اور امت مسلمہ کے اتحاد کے لیے خصوصی دعا کروائی۔ اس موقع پر تمام شرکاء میں شیرینی بھی تقسیم کی گئی۔
محفل کے بعد ختم نبوت چوک پر جلوس کا آغاز کیا گیا جو روایتی راستوں سے ہوتا ہوا پرامن طریقے سے اختتام پذیر ہوا۔ شرکاء کے لیے 105 دیگوں کا خصوصی انتظام کیا گیا۔ میلاد کمیٹی کے منتظمین نے بہترین انتظامات پر ضلعی انتظامیہ کا شکریہ ادا کیا۔
تحصیل چوبارہ اور تحصیل کروڑ میں بھی عید میلاد النبی ﷺ کے موقع پر جلوس و ریلیاں نکالی گئیں جن کی قیادت اسسٹنٹ کمشنرز محبوب اقبال ہنجرا اور نعمان محمود نے کی۔
