ملتان: چیئرمین سینیٹ سید یوسف رضا گیلانی نے کہا ہے کہ اسلام امن، محبت اور بھائی چارے کا دین ہے اور حضور اکرم ﷺ کی تعلیمات پوری انسانیت کے لیے مشعلِ راہ ہیں۔
وہ ملتان میں رکن صوبائی اسمبلی رانا اقبال سراج کی جانب سے عید میلاد النبی ﷺ کے سلسلے میں منعقدہ ایک پروقار تقریب سے خطاب کر رہے تھے۔ تقریب میں گورنر خیبرپختونخوا فیصل کریم کنڈی، سینیٹر رانا محمود الحسن، سابق صوبائی وزیر چوہدری عبدالوحید آرائیں، رانا شاہدالحسن، نعیم خان، راؤ مستقیم سمیت ملک بھر سے معروف نعت خواں حضرات، سیاسی و سماجی شخصیات، عمائدین شہر اور شہریوں کی بڑی تعداد شریک تھی۔
چیئرمین سینیٹ نے کہا کہ حضور اکرم ﷺ کا اسوۂ حسنہ اپنائے بغیر کسی بھی میدان میں کامیابی ممکن نہیں۔ ہمارے پیغمبر ﷺ نے تمام انسانیت کو شفقت اور محبت کا درس دیا، ہمیں دنیا بھر میں انہی تعلیمات کا پرچار کرنا ہے تاکہ اسلام کا پرچم اقوامِ عالم میں مزید بلند ہو۔
یوسف رضا گیلانی نے مزید کہا کہ جشنِ عید میلاد النبی ﷺ امت مسلمہ کے درمیان اتحاد اور یکجہتی کی علامت ہے۔ اسی تصور کی بنیاد پر قومی اسمبلی اور سینیٹ میں قرارداد منظور کی گئی کہ اس بابرکت دن کو سرکاری سطح پر شایانِ شان طریقے سے منایا جائے۔ آج پوری قوم اور امت مسلمہ عقیدت و احترام سے اپنے آقا ﷺ کی ولادت کا جشن منا رہی ہے اور یہ سلسلہ آئندہ بھی اسی جذبے کے ساتھ جاری رہے گا۔
