آئندہ 24 گھنٹوں میں پنجاب میں شدید بارشوں کی پیشگوئی، پی ڈی ایم اے نے الرٹ جاری کردیا

لاہور (پی ڈی ایم اے ترجمان) ─ پنجاب کے بیشتر اضلاع میں آئندہ 24 گھنٹوں کے دوران شدید طوفانی بارشوں کی پیشگوئی کی گئی ہے۔ پی ڈی ایم اے کے مطابق مون سون کا 10واں اسپیل 9 ستمبر تک جاری رہے گا۔

گزشتہ 24 گھنٹوں کی بارشیں

صوبے کے مختلف اضلاع میں مون سون بارشیں ریکارڈ کی گئیں:

• جہلم 96 ملی میٹر، جھنگ 77، نورپور تھل 70، خانیوال 55، لیہ 42، راولپنڈی 34، ساہیوال 32، منگلا 29، چکوال 26، ڈیرہ غازی خان 21، فیصل آباد 20 اور اوکاڑہ میں 17 ملی میٹر۔
• منڈی بہاؤالدین 16، بہاولپور اور ملتان 15، سرگودھا 14، جوہرآباد 13، ٹوبہ ٹیک سنگھ 11، کوٹ ادو 10، سیالکوٹ 6، نارووال 5 اور قصور میں 4 ملی میٹر تک بارش ریکارڈ ہوئی۔

آئندہ 24 گھنٹے

پی ڈی ایم اے نے بتایا کہ:

• راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات اور سیالکوٹ میں بارشیں متوقع ہیں۔
• نارووال، حافظ آباد، منڈی بہاؤالدین، اوکاڑہ، ساہیوال، قصور، جھنگ، سرگودھا اور میانوالی میں بارش کا امکان ہے۔
• ڈیرہ غازی خان، ملتان اور راجن پور میں بھی بارشیں متوقع ہیں۔

9 ستمبر تک ڈیرہ غازی خان کی رودکوہیوں میں فلیش فلڈنگ کا خدشہ ظاہر کیا گیا ہے۔

سیلابی صورتحال

ڈی جی پی ڈی ایم اے عرفان علی کاٹھیا کے مطابق دریائے چناب، راوی اور ستلج میں سیلابی صورتحال کا سامنا ہے جبکہ بڑے شہروں میں ندی نالے بھی بپھر سکتے ہیں۔

الرٹ اور حفاظتی تدابیر

پی ڈی ایم اے نے صوبہ بھر کے کمشنرز، ڈپٹی کمشنرز اور متعلقہ محکموں (صحت، آبپاشی، تعمیر و مواصلات، لوکل گورنمنٹ، لائیو اسٹاک) کو الرٹ رہنے کی ہدایات جاری کی ہیں۔

عوام کے لیے ہدایات:

• خراب موسم میں احتیاطی تدابیر اختیار کریں۔
• دریاؤں کے اطراف اکٹھے ہونے اور سیر و تفریح سے گریز کریں۔
• آندھی و طوفان کی صورت میں محفوظ مقامات پر رہیں۔
• ایمرجنسی کی صورت میں پی ڈی ایم اے ہیلپ لائن 1129 پر رابطہ کریں۔