اسلام آباد :وزیراعظم محمد شہباز شریف کی زیر صدارت ملک میں حالیہ سیلابی صورتحال اور جاری ریسکیو و امدادی اقدامات کے حوالے سے اعلیٰ سطح کا جائزہ اجلاس منعقد ہوا۔ اجلاس میں چیئرمین این ڈی ایم اے سمیت متعلقہ حکام نے شرکت کی اور وزیراعظم کو ملک بھر میں دریاؤں میں طغیانی، سیلابی ریلوں کی موجودہ کیفیت اور متاثرہ شہریوں کے لیے جاری امدادی کارروائیوں پر تفصیلی بریفنگ دی۔
چیئرمین این ڈی ایم اے نے بتایا کہ دریائے چناب، راوی اور ستلج میں پانی کی سطح میں مسلسل اضافہ ہو رہا ہے جبکہ تریمو بیراج، پنجند بیراج، ہیڈ بلوکی، ہیڈ سدھنائی، گنڈا سنگھ والا، ہیڈ سلیمانکی اور ہیڈ اسلام کے مقامات پر شدید طغیانی کی صورتحال درپیش ہے۔ بریفنگ میں کہا گیا کہ متاثرہ علاقوں کے لیے امدادی سامان کے قافلے تسلسل سے روانہ کیے جا رہے ہیں جبکہ ریسکیو ٹیمیں شہریوں کو محفوظ مقامات پر منتقل کرنے میں مصروف ہیں۔
وزیراعظم شہباز شریف نے ہدایت کی کہ این ڈی ایم اے ملک بھر میں جاری امدادی کارروائیوں کو مزید تیز کرے اور بڑھتی ہوئی طغیانی کے پیش نظر ممکنہ سیلابی صورتحال سے نمٹنے کے لیے پیشگی تیاری کو ہر صورت یقینی بنایا جائے۔ انہوں نے کہا کہ دریاؤں کے قریب رہائش پذیر اور ممکنہ خطرے سے دوچار آبادیوں کو بروقت اطلاع دی جائے اور ان کے انخلاء کے لیے فوری اقدامات اٹھائے جائیں۔
وزیراعظم نے این ڈی ایم اے کو صوبائی حکومتوں اور صوبائی ڈیزاسٹر مینجمنٹ اتھارٹیوں کے ساتھ قریبی رابطہ اور مکمل تعاون برقرار رکھنے کی بھی ہدایت دی۔ انہوں نے زور دیا کہ سیلاب میں لاپتہ افراد کی تلاش کے عمل کو تیز کیا جائے تاکہ زیادہ سے زیادہ قیمتی جانیں محفوظ کی جا سکیں۔
اجلاس کے دوران وزیراعظم کو ملک میں سیلاب کے باعث نقل مکانی پر مجبور ہونے والے افراد اور ان کی بحالی کے لیے جاری ریسکیو و ریلیف اقدامات سے بھی آگاہ کیا گیا۔
