وزیراعلیٰ مریم نواز شریف اور سعودی سفیر نے پی ڈی ایم اے کے حوالے کیا، 10 ہزار شیلٹر کٹس اور 10 ہزار فوڈ پیکجز شامل
لاہور (نمائندہ خصوصی) کنگ سلمان ایڈ اینڈ ریلیف سینٹر کی جانب سے پنجاب کے سات اضلاع کے سیلاب متاثرین کے لیے امدادی سامان پر مشتمل پانچ ٹرک لاہور پہنچ گئے۔ وزیراعلیٰ پنجاب مریم نواز شریف اور سعودی عرب کے سفیر نواف بن سعید احمد المالکی نے یہ امدادی سامان صوبائی ڈیزاسٹر مینجمنٹ اتھارٹی (پی ڈی ایم اے) کے سپرد کیا۔
کنگ سلمان ایڈ اینڈ ریلیف سینٹر کی طرف سے بھیجے گئے امدادی سامان میں 10 ہزار شیلٹر کٹس اور 10 ہزار فوڈ پیکجز شامل ہیں۔ شیلٹر کٹس میں خیمے، سولر پینل، ایل ای ڈی لائٹس، دو تھرمل کمبل، پلاسٹک میٹ، پائیدار کچن سیٹ، واٹر کولر اور اینٹی بیکٹیریل صابن شامل ہیں۔ فوڈ پیکجز (95 کلوگرام) میں آٹا، چینی، دال چنا اور کوکنگ آئل فراہم کیا گیا ہے۔
یہ امدادی سامان قصور، جھنگ، خانیوال، حافظ آباد، چنیوٹ، ملتان اور ٹوبہ ٹیک سنگھ کے سیلاب متاثرین میں تقسیم کیا جائے گا۔ تقسیم کا عمل پی ڈی ایم اے پنجاب، کنگ سلمان ریلیف سینٹر اور حیات فاؤنڈیشن کے اشتراک سے مکمل کیا جائے گا۔
وزیراعلیٰ پنجاب مریم نواز شریف نے اس موقع پر کہا کہ سیلاب زدگان کے لیے سعودی عرب کا امدادی سامان پاکستان کے ساتھ اخوت اور بھائی چارے کے تسلسل کی عکاسی کرتا ہے۔ انہوں نے خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کو خراج تحسین پیش کرتے ہوئے کہا کہ سعودی قیادت کا وژن، ہمدردی اور بصیرت امت مسلمہ کو وحدت اور ترقی کی طرف لے جا رہی ہے۔
مریم نواز شریف نے کہا کہ پنجاب میں شدید سیلاب کے دوران سعودی عرب کی بروقت امداد حقیقی بھائی چارے کی علامت ہے۔ 10 ہزار فوڈ باسکٹ اور 10 ہزار شیلٹر کٹس کی فراہمی پر حکومت پنجاب اور عوام سعودی حکومت اور عوام کے شکر گزار ہیں۔ انہوں نے کہا کہ یہ تعاون متاثرہ خاندانوں کے لیے ریلیف اور ہمیشہ یکجہتی کی علامت کے طور پر یاد رکھا جائے گا۔
وزیراعلیٰ نے مزید کہا کہ سیلابی صورتحال نے ایک بار پھر ثابت کر دیا ہے کہ پاک سعودی تعلقات صرف اسٹریٹجک نہیں بلکہ حقیقی اخوت و بھائی چارے پر مبنی ہیں۔ آزمائش کی ہر گھڑی میں سعودی عرب نے پاکستان کا ساتھ دیا ہے۔ انہوں نے کہا کہ پاکستان اور سعودی عرب کے درمیان معاشی تعاون مسلسل بڑھ رہا ہے اور یہ تعلقات مزید مضبوط ہوں گے۔
تقریب میں کنٹری ڈائریکٹر کنگ سلمان ایڈ اینڈ ریلیف سینٹر عبداللہ البقمی، پی ڈی ایم اے پنجاب کے حکام اور دیگر نمائندگان نے بھی شرکت کی۔
