اسلام آباد: قازقستان کے نائب وزیر اعظم و وزیر خارجہ جناب مورات نورتیلو (Murat Nurtleu) نے پاکستان کے سرکاری دورے کے دوران اپنے وزارتی وفد کے ہمراہ آج سہ پہر وزیر اعظم ہاؤس میں وزیر اعظم محمد شہباز شریف سے ملاقات کی۔
وزیر اعظم نے قازقستان کے نائب وزیر اعظم کو پاکستان کے پہلے دورے پر خوش آمدید کہا اور صدر قاسم جومارت توکایوف (Kassym-Jomart Tokayev) کے لیے نیک خواہشات کا اظہار کیا۔ انہوں نے کہا کہ پاکستان اور قازقستان کے مابین برادرانہ تعلقات قائم ہیں اور دونوں ممالک باہمی دلچسپی کے مختلف شعبوں میں تعلقات کو مزید فروغ دینا چاہتے ہیں۔
وزیراعظم نے اس موقع پر قازقستان کے ساتھ دوطرفہ تجارت، سرمایہ کاری، فضائی، ریل اور سڑک کے ذریعے رابطوں اور عوامی تبادلوں کو بڑھانے کی خواہش ظاہر کی۔ انہوں نے کہا کہ پاکستان قازقستان کے صدر کے آئندہ دورہ کو نہایت اہمیت دیتا ہے اور مختلف معاہدوں و مفاہمتی یادداشتوں کو حتمی شکل دینے کے لیے ایک وفد آستانہ بھیجنے کی پیشکش کرتا ہے۔
دونوں رہنماؤں نے اس بات پر اتفاق کیا کہ قازق صدر کے آئندہ دورہ پاکستان کے دوران متعدد اہم معاہدوں پر دستخط متوقع ہیں۔
قازقستان کے نائب وزیر اعظم نے وزیر اعظم پاکستان کی مہمان نوازی پر شکریہ ادا کرتے ہوئے کہا کہ صدر توکایوف کا دورہ اسلام آباد تاریخی اور کامیاب ہوگا اور یہ پاکستان و قازقستان تعلقات میں ایک نئے دور کا آغاز ثابت ہوگا۔
ملاقات میں نائب وزیر اعظم و وزیر خارجہ سینیٹر اسحاق ڈار، وزیر مواصلات عبدالعلیم خان، وزیر برائے اقتصادی امور احد خان چیمہ، وزیر ریلوے حنیف عباسی، وزیراعظم کے معاون خصوصی طارق فاطمی اور سیکرٹری خارجہ بھی شریک تھے۔
