لیہ – ایڈیشنل ڈپٹی کمشنر ریونیو محمد شاہد ملک کی زیر صدارت اوورسیز پاکستانیز کمیٹی کا اجلاس منعقد ہوا جس میں ڈپٹی سپرنٹنڈنٹ پولیس محمد حیات، ڈپٹی ڈسٹرکٹ اٹارنی رانا محمد بلال، متعلقہ محکموں کے افسران اور درخواست گزار اوورسیز پاکستانی شریک ہوئے۔

اجلاس میں 9 کیسز پیش کیے گئے جن پر سماعت کی گئی۔ ان میں سے 4 کیسز موقع پر حل کر دیے گئے جبکہ دیگر کیسز کو متعلقہ محکموں کی رپورٹس موصول ہونے تک مؤخر کر دیا گیا۔

اجلاس سے خطاب کرتے ہوئے ایڈیشنل ڈپٹی کمشنر ریونیو محمد شاہد ملک نے کہا کہ اوورسیز پاکستانی ملکی معیشت کی ریڑھ کی ہڈی ہیں۔ ان کے مسائل کے حل کے لیے یہ فورم قائم کیا گیا ہے تاکہ انہیں سہولت فراہم کی جا سکے۔ انہوں نے متعلقہ افسران کو ہدایت کی کہ تمام درخواست گزاروں کے مسائل کو فوری اور ترجیحی بنیادوں پر حل کیا جائے تاکہ بیرون ملک بسنے والے پاکستانیوں کو ہر ممکن سہولت میسر آ سکے۔