وزیراعظم شہباز شریف کا مشرق ڈیجیٹل بینک کے افتتاح پر خطاب

اسلام آباد :وزیراعظم محمد شہباز شریف نے کہا ہے کہ ڈیجیٹلائزیشن وقت کی اہم ضرورت ہے اور مشرق ڈیجیٹل ریٹیل بینک کا قیام پاکستان میں کیش لیس معیشت اور مالیاتی شعبے کی ترقی میں سنگ میل ثابت ہوگا۔ نوجوان ملک کی آبادی کا بڑا حصہ ہیں، یہ ہمارا قیمتی سرمایہ اور روشن مستقبل ہیں۔ معیشت کو مستحکم کرنے اور شفافیت لانے کے لیے ضروری ہے کہ اسے پیپر لیس بنایا جائے اور انسانی عمل دخل کم سے کم ہو۔

وہ منگل کو اسلام آباد میں پاکستان میں مشرق ڈیجیٹل ریٹیل بینک کی افتتاحی تقریب سے خطاب کر رہے تھے۔ اس موقع پر وفاقی وزیر خزانہ محمد اورنگزیب، وزیر منصوبہ بندی احسن اقبال، وزیر پٹرولیم علی پرویز ملک، وزیر ریلوے حنیف عباسی، وزیر بحری امور جنید انوار، گورنر اسٹیٹ بینک جمیل احمد اور سیکرٹری خزانہ امداد اللہ بوسال بھی موجود تھے۔

وزیراعظم کا خطاب

وزیراعظم نے کہا کہ پاکستان میں دوسرے ڈیجیٹل بینک کے طور پر مشرق بینک کا آغاز خوش آئند ہے۔ متحدہ عرب امارات ہمیشہ پاکستان کی سماجی و معاشی ترقی میں معاون رہا ہے اور دونوں ممالک کے تعلقات کو فروغ دینے میں یو اے ای کے کاروباری طبقے کا اہم کردار ہے۔
انہوں نے کہا کہ آج کا دور ڈیجیٹلائزیشن کا ہے اور جدید ٹیکنالوجی کے استعمال سے معیشت کو ترقی دی جا سکتی ہے۔ امید ہے کہ مشرق ڈیجیٹل بینک عوام کو جدید اور شفاف بینکاری خدمات فراہم کرے گا اور کاروباری، زرعی و صنعتی سرگرمیوں کو فروغ دینے میں کردار ادا کرے گا۔

وزیر خزانہ کا بیان

وفاقی وزیر خزانہ محمد اورنگزیب نے تقریب سے خطاب میں کہا کہ وزیراعظم شہباز شریف کی قیادت میں حکومت ملکی معیشت کو مستحکم کرنے کے لیے بھرپور کوشش کر رہی ہے۔ ترسیلات زر پاکستان کی معیشت کی لائف لائن ہیں جبکہ عالمی ریٹنگ ایجنسیوں نے بھی پاکستان کی مثبت کارکردگی کو تسلیم کیا ہے۔
انہوں نے کہا کہ حکومت توانائی، ایس او ایز، بینکاری اور دیگر شعبوں میں اصلاحات کر رہی ہے اور پالیسیوں کے تسلسل کو یقینی بنایا جائے گا۔ مشرق ڈیجیٹل بینک کا قیام مالیاتی شعبے کے لیے خوش آئند پیش رفت ہے۔

مشرق بینک قیادت کے خیالات

مشرق بینک کے چیئرمین عبدالعزیز الغریر نے کہا کہ پاکستان میں ڈیجیٹل بینکنگ کے سفر کا آغاز ہمارے لیے اعزاز ہے۔ پاکستان کا جغرافیائی محل وقوع اور معاشی سرگرمیوں کا ماحول اسے ڈیجیٹل اکنامک پاور ہاؤس بنانے کی صلاحیت رکھتا ہے۔ انہوں نے کہا کہ ہم صرف ڈیجیٹل بینک قائم نہیں کر رہے بلکہ پاکستان کی ترقی کے سفر میں شراکت دار بن رہے ہیں۔

مشرق بینک کے چیف ایگزیکٹو محمد ہمایوں سجاد نے کہا کہ گزشتہ سال پاکستان میں ڈیجیٹل ادائیگیوں میں 30 فیصد اضافہ ہوا۔ نوجوان ہی مالیاتی شعبے کا ڈیجیٹل مستقبل ہیں۔ اسٹیٹ بینک کی جانب سے ڈیجیٹل فریم ورک اور سائبر سکیورٹی کے اقدامات قابل تعریف ہیں۔

افتتاحی تقریب

تقریب کے اختتام پر وزیراعظم محمد شہباز شریف اور مشرق بینک کے چیئرمین عبدالعزیز الغریر نے پاکستان میں مشرق ڈیجیٹل ریٹیل بینک کا باضابطہ افتتاح کیا۔