ریاض: وزیرِاعظم پاکستان محمد شہباز شریف سعودی ولی عہد شہزادہ محمد بن سلمان کی خصوصی دعوت پر مملکتِ سعودی عرب کے سرکاری دورے پر ریاض پہنچ گئے۔
وزیرِاعظم کے ہمراہ پاکستانی اعلیٰ سطحی وفد بھی موجود تھا۔ کنگ خالد انٹرنیشنل ایئرپورٹ ریاض پر وزیرِاعظم کا پرتپاک استقبال کیا گیا۔ ریاض کے نائب گورنر محمد بن عبدالرحمن بن عبدالعزیز، پاکستان میں سعودی عرب کے سفیر نواف بن سعید المالکی، سعودی عرب میں پاکستان کے سفیر احمد فاروق اور اعلیٰ سفارتی حکام نے وزیرِاعظم کا استقبال کیا۔
ریاض آمد کے موقع پر شہر کی مختلف شاہراہوں پر سبز ہلالی پرچم لہرائے گئے۔ وزیرِاعظم کو 21 توپوں کی سلامی پیش کی گئی جبکہ سعودی عرب کی افواج کے چاک و چوبند دستے نے سلامی پیش کی۔
بعد ازاں وزیرِاعظم قصر یمامہ میں سعودی ولی عہد عزت مآب شہزادہ محمد بن سلمان سے ملاقات کریں گے، جہاں ان کا باضابطہ استقبال ہوگا۔ ملاقات میں پاکستان اور سعودی عرب کے تعلقات کے تمام پہلوؤں پر تفصیلی گفتگو ہوگی۔
دونوں رہنما باہمی دلچسپی کے علاقائی اور عالمی امور پر بھی تبادلۂ خیال کریں گے۔ توقع ہے کہ اس دورے کے دوران مختلف شعبوں میں تعاون کے حوالے سے اہم پیش رفت ہوگی، جو دونوں ممالک کے دیرینہ برادرانہ تعلقات کو مزید مستحکم کرنے کا باعث بنے گی۔
