ریاض: وزیرِاعظم پاکستان محمد شہباز شریف سعودی ولی عہد و وزیرِاعظم شہزادہ محمد بن سلمان سے ملاقات کے لیے سعودی شاہی دیوان، قصر یمامہ پہنچے۔
شاہی دیوان آمد پر وزیرِاعظم کا شاندار استقبال کیا گیا۔ گھڑ سوار دستوں نے سعودی شاہی پروٹوکول کے مطابق وزیرِاعظم کو خوش آمدید کہا۔ اس موقع پر سعودی ولی عہد شہزادہ محمد بن سلمان نے بنفس نفیس وزیرِاعظم کا استقبال کیا۔ وزیرِاعظم کو سعودی مسلح افواج کے دستوں نے گارڈ آف آنر بھی پیش کیا۔
بعدازاں وزیرِاعظم محمد شہباز شریف اور سعودی ولی عہد کے درمیان دوطرفہ ملاقات کا آغاز ہوا۔ ملاقات میں دونوں ممالک کے اعلیٰ سطحی وفود بھی شریک ہیں۔
پاکستانی وفد میں نائب وزیرِاعظم و وزیرِخارجہ محمد اسحاق ڈار، چیف آف آرمی اسٹاف فیلڈ مارشل سید عاصم منیر، وزیرِدفاع خواجہ محمد آصف، وزیرِخزانہ محمد اورنگزیب، وزیرِموسمیاتی تبدیلی ڈاکٹر مصدق ملک اور معاون خصوصی سید طارق فاطمی شامل ہیں۔
ملاقات میں پاکستان اور سعودی عرب کے درمیان دوطرفہ تعلقات کے فروغ، دفاع، معیشت، سرمایہ کاری اور دیگر شعبوں میں تعاون سمیت خطے اور عالمی امور پر تبادلۂ خیال کیا جا رہا ہے۔
