ضلع لیہ میں عوامی مسائل کے فوری حل اور شہریوں کو براہِ راست ریلیف فراہم کرنے کے لیے ضلعی انتظامیہ کی جانب سے کھلی کچہریوں کے انعقاد کا سلسلہ تسلسل کے ساتھ جاری ہے۔ ان کھلی کچہریوں کا مقصد یہ ہے کہ عوامی شکایات براہِ راست افسران تک پہنچ سکیں اور ان کے حل کے لیے موقع پر ہی عملی اقدامات کیے جائیں۔
اسی سلسلے کی ایک اہم کڑی کے طور پر ڈپٹی کمشنر لیہ امیر ابیدار کی زیر صدارت یونین کونسل آفس کوٹ سلطان میں کھلی کچہری منعقد ہوئی۔ اس موقع پر اسسٹنٹ کمشنر حارث حمید خان اور مختلف محکموں کے افسران بھی موجود تھے۔ کھلی کچہری میں شہری بڑی تعداد میں شریک ہوئے اور اپنے مسائل براہِ راست ضلعی سربراہ کے سامنے رکھے۔ ڈپٹی کمشنر نے شکایات فرداً فرداً سنیں اور متعدد مسائل کے حل کے لیے موقع پر ہی متعلقہ محکموں کو احکامات جاری کیے۔
ڈپٹی کمشنر امیر ابیدار نے خطاب کرتے ہوئے کہا کہ کھلی کچہریوں کے انعقاد کا مقصد وزیر اعلیٰ پنجاب مریم نواز شریف کے عوام دوست ویژن کو عملی شکل دینا ہے تاکہ عوام کو ان کی دہلیز پر سہولیات فراہم کی جا سکیں۔ انہوں نے کہا کہ شہریوں کو دفاتر کے چکر لگانے سے نجات دلانا ضلعی انتظامیہ کی اولین ترجیح ہے۔ کھلی کچہریاں حکومت پنجاب کا عوامی خدمت پر مبنی اقدام ہیں جہاں شکایات کو بروقت سنا جاتا ہے اور فوری حل کے لیے اقدامات اٹھائے جاتے ہیں۔
انہوں نے واضح کیا کہ عوامی مسائل کے حل میں کسی قسم کی کوتاہی برداشت نہیں کی جائے گی اور تمام افسران کو سختی سے ہدایت دی گئی ہے کہ کھلی کچہریوں میں پیش کیے جانے والے مسائل پر فوری عمل درآمد یقینی بنایا جائے۔
اسی روز تحصیل کروڑ میں ایڈیشنل ڈپٹی کمشنر ریونیو محمد شاہد ملک نے سب تحصیل آفس فتح پور میں کھلی کچہری کی صدارت کی۔ اس موقع پر اسسٹنٹ کمشنر محبوب اقبال ہنجرا اور دیگر محکموں کے افسران موجود تھے۔ شہریوں نے اپنے مسائل پیش کیے جن پر متعدد معاملات میں موقع پر ہی احکامات جاری کیے گئے۔
علاوہ ازیں تحصیل چوبارہ کے یونین کونسل جمال چھپری میں بھی کھلی کچہری منعقد ہوئی جس کی صدارت اسسٹنٹ کمشنر فہد نور نے کی۔ انہوں نے عوامی مسائل براہِ راست سنے اور موقع پر ہی متعلقہ محکموں کو مسائل کے فوری حل کے لیے احکامات دیے۔
ان کھلی کچہریوں کے انعقاد سے یہ بات اجاگر ہو رہی ہے کہ ضلعی انتظامیہ عوامی مسائل کے حل کے لیے بھرپور سرگرم ہے اور حکومت پنجاب کے عوامی خدمت کے ایجنڈے کو عملی جامہ پہنانے کے لیے مؤثر اقدامات اٹھا رہی ہے۔
