لاہور: پاکستان کرکٹ بورڈ نے آئی سی سی ویمنز کرکٹ ورلڈ کپ 2025 کے لیے 15 رکنی اسکواڈ کا اعلان کر دیا ہے۔ ٹیم کی قیادت فاطمہ ثناء کے سپرد کی گئی ہے جبکہ ایمن فاطمہ سمیت کئی نئے کھلاڑیوں کو بھی اسکواڈ میں شامل کیا گیا ہے، جنہوں نے حال ہی میں آئرلینڈ کے خلاف ٹی ٹوئنٹی انٹرنیشنل ڈیبیو کیا تھا۔
پی سی بی کے مطابق پاکستان ویمن ٹیم ورلڈ کپ میں حصہ لے گی تاہم بھارتی سرزمین پر کوئی میچ نہیں کھیلا جائے گا۔ پاکستان کے میچز ایک غیر جانبدار مقام، کولمبو (سری لنکا) میں منعقد ہوں گے۔ یہ فیصلہ “ہیبرڈ ماڈل” کے تحت کیا گیا ہے تاکہ کسی قسم کی رکاوٹ نہ آئے۔
علاوہ ازیں پی سی بی نے ویمن ٹیم کے 2025-26 سیزن کا شیڈول بھی جاری کر دیا ہے۔ اس کے مطابق ساؤتھ افریقہ کے خلاف تین میچوں پر مشتمل ون ڈے سیریز 16 سے 22 ستمبر کو لاہور میں کھیلی جائے گی۔ ورلڈ کپ کے میچز 30 ستمبر سے 2 نومبر تک ہوں گے۔ اس کے بعد ٹیم ساؤتھ افریقہ اور زمبابوے کے دورے بھی کرے گی، جہاں ون ڈے اور ٹی ٹوئنٹی سیریز طے ہیں۔
ماہرین کے مطابق ویمن کرکٹ کے لیے یہ شیڈول ایک اہم سنگِ میل ثابت ہوگا کیونکہ اس سے نہ صرف قومی ٹیم کو زیادہ مواقع میسر آئیں گے بلکہ نئے کھلاڑیوں کو بھی اپنی صلاحیتیں دکھانے کا موقع ملے گا۔
