ڈپٹی کمشنر امیرا بیدار کی ہدایت پر ضلع لیہ سمیت پورے ضلع میں آلودگی کے تدارک کے لیے بھٹہ خشت اور دھواں چھوڑنے والی فیکٹریوں کے خلاف کارروائیاں جاری ہیں۔

اسسٹنٹ ڈائریکٹر ماحولیات ارشد چغتائی کے مطابق گزشتہ روز کروڑ میں اینٹوں کی غیر قانونی بھرائی پر 3 بھٹہ مالکان کے خلاف مقدمات درج کیے گئے جبکہ 4 بھٹہ جات کی غیر قانونی بھرائی کو مسمار کر دیا گیا۔

انہوں نے کہا کہ زگ زیگ ٹیکنالوجی کے برعکس بھٹہ خشت میں اینٹوں کی بھرائی اور جلائی پر مکمل پابندی عائد ہے اور محکمہ ماحولیات اس پر سختی سے عملدرآمد کروا رہا ہے۔

مزید بتایا گیا کہ سموگ سیزن کے پیش نظر کارروائیوں میں مزید تیزی لائی گئی ہے اور فضائی آلودگی کا باعث بننے والے بھٹہ خشت، فیکٹریوں، گاڑیوں اور خصوصاً کوئلہ کی بھٹیوں کے خلاف زیرو ٹالرینس پالیسی کے تحت سخت کارروائی عمل میں لائی جائے گی۔