مظفرگڑھ:
کمشنر ڈیرہ غازی خان اشفاق احمد چوہدری نے گورنمنٹ کیمپری ہنسو ہائی اسکول مظفرگڑھ کا دورہ کیا اور وہاں قائم ریلیف کیمپ میں مقیم سیلاب متاثرین سے ملاقات کی۔ اس موقع پر وائس چانسلر غازی یونیورسٹی ڈیرہ غازی خان پروفیسر ڈاکٹر اشفاق احمد اور دیگر ضلعی حکام بھی ان کے ہمراہ تھے۔
کمشنر اشفاق احمد چوہدری نے متاثرین میں امدادی سامان تقسیم کیا جس میں لحاف، مچھر دانیاں، کپڑے، راشن اور دیگر ضروری اشیاء شامل تھیں۔ یہ سامان غازی یونیورسٹی کے طلباء، طالبات اور اساتذہ کی جانب سے خصوصی طور پر سیلاب متاثرین کے لیے جمع کیا گیا تھا۔
متاثرین سے گفتگو کرتے ہوئے کمشنر نے کہا کہ حکومت اور انتظامیہ ان مشکل حالات میں متاثرہ خاندانوں کو تنہا نہیں چھوڑے گی۔ انہوں نے یقین دلایا:
"سیلاب متاثرین کی مکمل بحالی تک ہم ان کے ساتھ ہیں۔ وزیراعلیٰ پنجاب مریم نواز شریف کی خصوصی ہدایت پر متاثرین کو معاوضہ بھی ادا کیا جائے گا تاکہ ان کے نقصان کا ازالہ ممکن بنایا جا سکے۔”
کمشنر نے غازی یونیورسٹی کے طلباء اور اساتذہ کے جذبہ خدمت کو سراہتے ہوئے کہا کہ معاشرے کے تمام طبقات کو مشکل وقت میں آگے بڑھ کر اپنا کردار ادا کرنا چاہیے۔
دوسری جانب ریلیف کیمپ میں موجود متاثرین نے حکومت پنجاب، ضلعی انتظامیہ اور غازی یونیورسٹی کے تعاون پر اظہارِ تشکر کیا اور کہا کہ ان اقدامات سے ان کی مشکلات کم ہو رہی ہیں اور انہیں اپنے گھروں کی بحالی اور زندگی کو معمول پر لانے کی امید ملی ہے۔
