لیہ: ڈی ایس پی پٹرولنگ ضلع لیہ راؤ عمر فاروق نے پٹرولنگ پوسٹ رفیق آباد لائسنس سینٹر کا معائنہ کیا۔ اس موقع پر انہوں نے لائسنس سینٹر کے عملے کو ہدایت کی کہ لائسینسنگ پراسس میں شفافیت اور بہتری لائی جائے اور لائسنس بنوانے کے لیے آنے والے شہریوں کے ساتھ قانون کے مطابق تعاون کو یقینی بنایا جائے۔ انہوں نے واضح کیا کہ مقررہ فیس سے تجاوز ہرگز برداشت نہیں کیا جائے گا اور کرپشن کی کسی بھی شکایت پر سخت کارروائی عمل میں لائی جائے گی
اس موقع پر کسانوں کے ایک وفد سے ملاقات کے دوران ڈی ایس پی پٹرولنگ نے کہا کہ حکومت پنجاب کی ہدایت پر سموگ سے بچاؤ کے اقدامات کیے جا رہے ہیں۔ تمام کسانوں کو ہدایت کی گئی کہ وہ فصلوں کی باقیات کو نہ جلائیں کیونکہ اس سے سموگ اور ماحولیاتی آلودگی میں اضافہ ہوتا ہے۔ انہوں نے کہا کہ خلاف ورزی کرنے والوں کے خلاف قانونی کارروائی عمل میں لائی جائے گی۔
ڈی ایس پی پٹرولنگ راؤ عمر فاروق نے بتایا کہ گزشتہ ماہ (ستمبر) کے دوران قانون شکن ڈرائیوروں کے خلاف 8247 چالان کیے گئے، اوورلوڈنگ اور اوور اسپیڈنگ پر 125 مقدمات درج کیے گئے جبکہ 403 بغیر نمبر پلیٹ اور غیر رجسٹرڈ موٹر سائیکل تھانوں میں بند کیے گئے۔ علاوہ ازیں دوران سفر 134 افراد کو ہیلپ فراہم کی گئی۔
انہوں نے کہا کہ بغیر ہیلمٹ موٹر سائیکل سوار، بغیر لائسنس ڈرائیورز اور ایسے افراد جن کے لائسنس کی معیاد ختم ہوچکی ہے وہ فوری طور پر نیا لائسنس بنوائیں۔
ڈی ایس پی پٹرولنگ راؤ عمر فاروق نے اس عزم کا اظہار کیا کہ پٹرولنگ پولیس اپنے فرض کو عبادت سمجھتے ہوئے عوام الناس کو تحفظ فراہم کرنے کے لیے سرگرم عمل ہے۔ شہریوں کی حفاظت اور بروقت مدد ہماری اولین ترجیح ہے، اور کسی بھی ایمرجنسی کی صورت میں پٹرولنگ پولیس سڑکوں پر گشت کے ذریعے فوری رسپانس یقینی بناتی ہے۔
