ضلع لیہ کے ہونہار طالب علم محمد حمزہ قمر نے شاندار تعلیمی کامیابی حاصل کر کے ضلع کا نام روشن کر دیا۔ گورنمنٹ گریجویٹ کالج لیہ کے طالب علم نے ایف ایس سی (پری انجینئرنگ) کے امتحان میں 1156 نمبر حاصل کیے اور بورڈ آف انٹرمیڈیٹ اینڈ سیکنڈری ایجوکیشن ڈیرہ غازی خان میں نمایاں مقام حاصل کیا۔
وزیراعلیٰ پنجاب نے نوجوان ٹیلنٹ کی حوصلہ افزائی کرتے ہوئے محمد حمزہ قمر کو 5 لاکھ روپے نقد انعام دینے کا اعلان کیا۔
ہونہار طالب علم کے والد، قمر ریاض، بطور پبلک ہیلتھ ٹیکنیشن بنیادی مرکز صحت گرے والا میں خدمات سرانجام دے رہے ہیں۔
وزیر تعلیم رانا سکندر حیات اور کمشنر ڈیرہ غازی خان ڈویژن چوہدری اشفاق احمد نے اس کامیابی کو طلبہ کے لیے ایک روشن مثال قرار دیتے ہوئے نوجوان کی محنت کو سراہا۔
ڈپٹی کمشنر لیہ محترمہ امیرابیدار نے بھی محمد حمزہ قمر کو خراجِ تحسین پیش کرتے ہوئے اس کامیابی کو ضلع لیہ کے لیے ایک منفرد اعزاز قرار دیا۔
