وزیراعلیٰ پنجاب مریم نواز شریف کی زیرِ صدارت گندم سے متعلق ایک اہم اجلاس منعقد ہوا، جس میں کاشتکاروں سے گندم کی فصل 3500 روپے فی من خریدنے کے لیے حکومتِ پنجاب اور پرائیویٹ سیکٹر کے درمیان معاہدہ طے پایا۔

اجلاس میں محکمہ زراعت کی جانب سے گندم کی کاشت کے حوالے سے تفصیلی بریفنگ دی گئی، اور آئندہ سال کے لیے گندم کی خریداری کا جامع پلان پیش کیا گیا۔

بریفنگ میں بتایا گیا کہ پنجاب میں گندم کی کمی نہیں، وافر ذخائر موجود ہیں۔
وزیراعلیٰ مریم نواز شریف نے اجلاس سے خطاب کرتے ہوئے کہا:

“کاشتکار ہمارے بھائی ہیں، ان کا ساتھ کبھی نہیں چھوڑیں گے۔”

انہوں نے کہا کہ پاکستان کی تاریخ میں پہلی بار گندم کے کاشتکاروں کو ایک ہزار مفت ٹریکٹر فراہم کیے گئے ہیں، جبکہ کسان کارڈ کے ذریعے اربوں روپے کے زرعی مداخل بھی دیے گئے ہیں۔

مزید کہا کہ پنجاب میں ہر قسم کی کھاد کنٹرول ریٹ پر وافر مقدار میں دستیاب ہے تاکہ کسانوں کو کسی قسم کی دشواری کا سامنا نہ ہو۔