(لیہ میڈیا ہاوس لیہ) ڈی ایچ کیو ہسپتال کے چلڈرن وارڈ میں تھیلیسیمیا یونٹ کی ایکسٹینشن کر دی گئی۔ تھیلیسیمیا یونٹ میں بیڈز کی تعداد 5 سے بڑھا کر 13 کر دی گئی۔ ڈپٹی کمشنر لیہ امیرا بیدار نے گزشتہ روز تھیلیسیمیا یونٹ کی ایکسٹینشن کا افتتاح کیا۔ اس موقع پر اے ڈی سی آر شاہد ملک، سی ای او صحت ڈاکٹر شاہد ریاض، ایم ایس ڈاکٹر غلام محی الدین، ہیڈ پیڈز ڈیپارٹمنٹ ڈاکٹر ام سلمہ، اسسٹنٹ پرنسپل میڈیکل آفیسر ڈاکٹر ذوالفقار سواگ، چائلڈ اسپیشلسٹ ڈاکٹر محمد آصف موجود تھے۔ ڈپٹی کمشنر امیرا بیدار نے گزشتہ روز افتتاحی تقریب کے موقع پر گفتگو کرتے ہوئے کہا کہ تھیلیسیمیا ایک تکلیف دہ مرض ہے جس کی وجہ سے پورا خاندان مضطرب رہتا ہے۔ انہوں نے کہا کہ چلڈرن وارڈ میں تھیلیسیمیا یونٹ کی ایکسٹینشن وقت کا ناگزیر تقاضا تھا جس میں بیڈز کی تعداد میں خاطر خواہ اضافہ کیا گیا ہے۔ انہوں نے کہا کہ ضلع میں تھیلیسیمیا یونٹ کی تعداد بڑھانے کے لئے اقدامات کئے جائیں گے۔ وزیر اعلیٰ پنجاب مریم نواز شریف عوام کو صحت کی سہولیات فراہم کرنے کے لئے عملی اقدامات اٹھا رہی ہیں اور تھیلیسیمیا یونٹ کی ایکسٹینشن ان اقدامات کا تسلسل ہے۔ ڈپٹی کمشنر نے ہیڈ پیڈز ڈیپارٹمنٹ ڈاکٹر ام سلمہ کی کاوشوں کو بھی سراہا۔ انہوں نے کہا کہ تھیلیسیمیا بارے عوامی آگاہی بہت ضروری ہے۔ جدید سہولیات کی موجودگی میں اس مرض سے بچا جا سکتا ہے۔ شادی سے قبل ضروری ٹیسٹوں سے اس بارے بروقت آگاہی حاصل کی جا سکتی ہے۔