لیہ: ڈپٹی کمشنر امیرا بیدار کی زیر صدارت بلدیاتی انتخابات اور لوکل گورنمنٹ ایکٹ 2025 کا جائزہ اجلاس گزشتہ روز ڈی سی آفس لیہ میں منعقد ہوا۔ اجلاس میں ایڈیشنل ڈپٹی کمشنر جنرل شبیر احمد ڈوگر، ڈسٹرکٹ الیکشن کمشنر خلیل احمد، اسسٹنٹ کمشنر لیہ حارث حمید خان، اسسٹنٹ کمشنر کروڑ محبوب اقبال ہنجرا سمیت متعلقہ افسران نے شرکت کی۔

اجلاس میں پنجاب لوکل گورنمنٹ ایکٹ 2025 کے مختلف پہلوؤں اور اس کے نفاذ سے متعلق امور کا تفصیلی جائزہ لیا گیا۔

ڈپٹی کمشنر امیرا بیدار نے کہا کہ حکومت پنجاب وزیراعلیٰ مریم نواز شریف کی قیادت میں اختیارات اور اقتدار کی نچلی سطح تک منتقلی کے وژن پر عمل پیرا ہے تاکہ عوامی نمائندوں کے ذریعے عوامی خدمت کے نظام کو مؤثر بنایا جا سکے۔

انہوں نے کہا کہ پنجاب لوکل گورنمنٹ ایکٹ 2025 کے تحت ہونے والے بلدیاتی انتخابات کے نتیجے میں بننے والی ضلع کونسل، تحصیل کونسل اور یونین کونسل باڈیز سے تعمیر و ترقی کا نیا دور شروع ہوگا۔

ڈپٹی کمشنر نے ہدایت کی کہ نئے لوکل گورنمنٹ ایکٹ کے تحت حلقہ بندی کے لیے تمام ضروری اقدامات بروقت مکمل کیے جائیں اور بلدیاتی انتخابات سے قبل تمام مراحل کو دائرہ کار کے مطابق پایۂ تکمیل تک پہنچایا جائے۔