لیّہ — یونیورسٹی آف لیّہ کے آفس آف ریسرچ، انوویشن اینڈ کمرشلائزیشن (ORIC) کے زیرِ اہتمام پاکستان سائنٹیفک اینڈ ٹیکنالوجیکل انفارمیشن سینٹر (PASTIC)، اسلام آباد کے اشتراک سے “لٹریچر سرچنگ اور مینجمنٹ اسکلز فار ریسرچرز” کے عنوان سے ایک قومی ویبینار (ہائبرڈ موڈ) کا کامیاب انعقاد کیا گیا۔
یہ ویبینار یونیورسٹی آف لیّہ کے سٹی کیمپس میں منعقد ہوا جبکہ زوم کے ذریعے آن لائن شرکت کی سہولت بھی فراہم کی گئی۔ پروگرام کی نظامت ڈاکٹر سید حسن رضا زیدی نے انجام دی جنہوں نے معزز مہمانانِ گرامی اور شرکاء کو خوش آمدید کہا۔
پیسٹک اسلام آباد کی جانب سے مسٹر محمد حسنین، ایڈیشنل ڈائریکٹر (SIT) نے ادارے کے مقاصد، خدمات اور پاکستان میں سائنسی و تحقیقی معلومات کے فروغ میں پیسٹک کے کلیدی کردار پر تفصیلی روشنی ڈالی۔
جبکہ ڈاکٹر مریم ابرار، ایڈیشنل ڈائریکٹر (STI)، پیسٹک اسلام آباد نے ویبینار کے کلیدی سیشن (Keynote Session) میں گفتگو کرتے ہوئے تحقیقی لٹریچر کی تلاش، حوالہ جات کے نظم و نسق (Citation Management) اور جدید ڈیجیٹل ٹولز جیسے Mendeley کے مؤثر استعمال پر جامع پریزنٹیشن پیش کی۔ ان کی گفتگو کا مقصد محققین کو علمی مواد تک مؤثر رسائی، تنظیم اور بہتر انتظام کے جدید طریقے سکھانا تھا۔
افتتاحی خطاب پروفیسر ڈاکٹر محمد زبیر ابو بکر، وائس چانسلر یونیورسٹی آف لیّہ کی ہدایت پر پیش کیا گیا، جس میں انہوں نے ORIC اور پیسٹک کے اشتراک کو سراہا۔ وائس چانسلر نے ریسرچ پر مبنی تعلیم، جدید تحقیقاتی مہارتوں کے فروغ اور سائنسی معلومات کے تبادلے کی ثقافت کو مضبوط بنانے کی ضرورت پر زور دیا۔ انہوں نے فیکلٹی ممبران اور طلباء کو قومی تحقیقی ذرائع سے بھرپور استفادہ کرنے کی ترغیب دی تاکہ تحقیق کے معیار کو مزید بہتر بنایا جا سکے۔
اختتامی کلمات ڈاکٹر ذیشان حسن، ڈائریکٹر ORIC اور چیئرمین ڈیپارٹمنٹ آف پلانٹ پروڈکشن اینڈ بایو ٹیکنالوجی نے پیش کیے۔ انہوں نے پیسٹک کے نمائندگان، انتظامی ٹیم اور تمام شرکاء کا شکریہ ادا کرتے ہوئے کہا کہ یہ ویبینار تحقیق اور جدت کی نئی راہیں ہموار کرنے میں سنگِ میل ثابت ہوگا۔
ویبینار کی انتظامی کمیٹی میں ڈاکٹر محمد عمار رضا، ڈاکٹر اعجاز احمد، ڈاکٹر عقبہ سعید، اور مسٹر اظہر اسلام شامل تھے جبکہ مجموعی نگرانی ڈاکٹر ذیشان حسن نے کی۔
پروفیسر ڈاکٹر محمد زبیر ابو بکر، وائس چانسلر یونیورسٹی آف لیّہ، اس تقریب کے پَیٹرن اِن چیف تھے۔
یہ ویبینار مختلف جامعات و تحقیقی اداروں کے محققین، اساتذہ اور طلباء کو ایک پلیٹ فارم پر جمع کرنے میں کامیاب رہا، جس نے تحقیق، اختراع اور سائنسی استعداد کار میں اضافے کے لیے یونیورسٹی آف لیّہ اور پیسٹک کے عزم کو مزید مضبوط کیا۔
