لیہ — ایڈیشنل ڈپٹی کمشنر ریونیو شاہد ملک نے کہا ہے کہ 10 ویں تھل جیپ ریلی اور لیہ تھل میلہ کو یادگار اور مثالی ایونٹ بنانے کے لیے تمام محکمے بھرپور کردار ادا کریں۔ وہ منگل کے روز منعقدہ تھل جیپ ریلی کے دوسرے جائزہ اجلاس کی صدارت کر رہے تھے۔
اجلاس میں اسسٹنٹ کمشنرز محبوب اقبال ہنجرا، ارشد ندیم، ایڈیشنل ڈائریکٹر لائیو اسٹاک ڈاکٹر طارق گدارہ، ڈپٹی ڈائریکٹر ڈویلپمنٹ اسحاق کھیرانی، ڈپٹی ڈائریکٹر فوڈ وقار بودلہ، ڈپٹی ڈائریکٹر سوشل ویلفیئر صائمہ سیماب، ایکسیئن بلڈنگ سجاد حسین، چیف ایگزیکٹو آفیسر ہیلتھ ڈاکٹر شاہد ریاض، ڈی ای اوز تعلیم گل شیر اور محمد رضوان، ڈی ایف او فضل الرحمان، انچارج سیکیورٹی برانچ یاسر گرمانی، ڈی ڈی لوکل گورنمنٹ احسان احمد، سی او ایم سیز عمار گرمانی اور ارسلان احمد، ڈی او انڈسٹری عاشق حسین، ڈی او وائلڈ لائف کاشف حمید، ڈی او سپورٹس امتیاز بھٹی، سی ڈی او توقیر عباس، سپورٹس کوچ عارف چھینہ، متعلقہ محکموں کے افسران، ڈائریکٹر جی سی یونیورسٹی رائے عباس بھٹی اور تھل انڈسٹریز کے نمائندے شریک تھے۔
اے ڈی سی آر شاہد ملک نے اجلاس سے خطاب کرتے ہوئے کہا کہ تھل جیپ ریلی اور لیہ تھل میلہ ضلع لیہ کی پہچان بن چکے ہیں۔ یہ ایونٹس نہ صرف لیہ کی ثقافت، روایت اور تاریخی ورثے کو اجاگر کرتے ہیں بلکہ سیاحت، کھیل اور عوامی تفریح کے فروغ میں بھی اہم کردار ادا کرتے ہیں۔
انہوں نے کہا کہ وزیر اعلیٰ پنجاب مریم نواز شریف کی خصوصی ہدایات پر صوبے بھر میں سپورٹس اور سیاحت کے فروغ کے لیے عملی اقدامات کیے جا رہے ہیں۔ لیہ کے عوام کو اس مرتبہ ایک یادگار اور رنگا رنگ سپورٹس ایونٹ دیکھنے کو ملے گا۔
شاہد ملک نے ہدایت کی کہ فوڈ اسٹریٹ، پانی کے مناسب انتظامات، کھیلوں کے مقابلے، آتش بازی، اور میوزیکل نائٹ کے بہترین انتظامات یقینی بنائے جائیں تاکہ شہریوں کو خوشگوار تفریح فراہم کی جا سکے۔
انہوں نے تمام اداروں کو اپنی ذمہ داریاں احسن انداز میں ادا کرنے اور ضلع لیہ کے اس نمایاں ایونٹ کو کامیاب بنانے کے لیے مشترکہ کوششوں پر زور دیا۔
