لیہ: ڈپٹی کمشنر امیرا بیدار نے کہا ہے کہ ضلع کے مثالی امن کو ہر صورت برقرار رکھا جائے گا، لاؤڈ اسپیکر ایکٹ پر سختی سے عملدرآمد کروایا جائے گا اور آذان و خطبہ کے علاوہ لاؤڈ اسپیکر کے غیر ضروری استعمال پر مقدمات درج کیے جائیں گے۔ انہوں نے واضح کیا کہ شرپسندی اور شرپسند عناصر سے آہنی ہاتھوں سے نمٹا جائے گا۔
یہ بات انہوں نے کمیٹی روم میں ضلعی امن کمیٹی کے اجلاس کی صدارت کرتے ہوئے کہی۔ اجلاس میں ایڈیشنل ڈپٹی کمشنرز شاہد ملک، شبیر احمد ڈوگر، اسسٹنٹ کمشنر حارث حمید خان، انچارج سیکیورٹی برانچ یاسر گرمانی اور امن کمیٹی کے ممبران طلحہ زبیر، سید ثقلین زیدی، عبدالرؤف، محمود احمد عثمانی، مخدوم مدثر حسین شریک تھے۔
ڈپٹی کمشنر نے کہا کہ امن و امان کے قیام کے لیے حکومتِ پنجاب کے احکامات پر من و عن عملدرآمد کیا جائے گا۔
انہوں نے ہدایت کی کہ شر انگیزی پر مبنی سوشل میڈیا پوسٹ کرنے، لائک یا شیئر کرنے والے افراد کے خلاف فوری ایف آئی آر درج کی جائے۔
مزید کہا گیا کہ مدارس کی رجسٹریشن یقینی بنائی جائے اور ضلع میں زیر تعلیم غیر ملکی طلبہ کے نامکمل کوائف یا کاغذات کی صورت میں انہیں فوری طور پر پولیس کے حوالے کیا جائے۔
ڈپٹی کمشنر امیرا بیدار نے کہا کہ اسلام امن، محبت اور بھائی چارے کا درس دیتا ہے، کسی شہری کو قانون ہاتھ میں لینے یا جتھہ کلچر اختیار کرنے کی اجازت نہیں دی جائے گی۔
انہوں نے زور دیا کہ تمام مکاتب فکر کے لوگ امن کے لیے متحد ہیں، اور ممبران امن کمیٹی نے ہمیشہ ضلعی امن کے قیام میں مثالی کردار ادا کیا ہے۔
اختتام پر ملکی سلامتی اور امن و امان کے لیے خصوصی دعا کی گئی۔
