لاہور:وزیراعلیٰ پنجاب مریم نواز شریف نے ”اپنی چھت، اپنا گھر“ پراجیکٹ کے تحت ایک لاکھ گھروں کا ہدف پورا ہونے پر اظہارِ تشکر کیا ہے۔

وزیراعلیٰ نے کہا کہ کم آمدن والے ایک لاکھ خاندانوں کو بلاسود اور آسان قرضے فراہم کرنے کا ٹارگٹ مکمل کر لیا گیا ہے، جو کہ غریب اور متوسط طبقے کے لیے ایک تاریخی سنگِ میل ہے۔

مریم نواز شریف نے ”اپنی چھت، اپنا گھر“ پراجیکٹ کے تحت گھر تعمیر کرنے والے تمام افراد کو مبارکباد دی اور پراجیکٹ ٹیم کو 10 ماہ میں ایک سال کا ہدف حاصل کرنے پر شاباش دیتے ہوئے کہا کہ یہ کامیابی محنت، شفافیت اور خدمت کے جذبے کی عکاسی کرتی ہے۔

تفصیلات کے مطابق، پراجیکٹ کے تحت اب تک 100,835 خاندانوں کو 120 ارب روپے کے قرضے جاری کیے جا چکے ہیں، 22,305 گھر آباد ہو چکے ہیں جبکہ 64,190 گھر تکمیل کے آخری مراحل میں ہیں۔

وزیراعلیٰ پنجاب نے کہا کہ ”اپنی چھت، اپنا گھر“ پراجیکٹ نے ہاؤسنگ کے شعبے میں نئی تاریخ رقم کی ہے۔
انہوں نے کہا کہ غریب آدمی کو چھت ملنے کا خواب قائد محمد نواز شریف نے دیکھا تھا، اور اللہ تعالیٰ نے اس خواب کو عملی جامہ پہنانے کی توفیق ہمیں دی۔

مریم نواز شریف نے مزید کہا کہ 10 ماہ میں ایک لاکھ قرضوں کا شفاف اجراء ایک قابلِ تقلید مثال ہے، اور پانچ سال میں پانچ لاکھ گھروں کا ہدف حاصل کرنے کا عزم غیر متزلزل ہے۔

انہوں نے کہا کہ ”اپنی چھت، اپنا گھر“ پراجیکٹ سے پہلی مرتبہ عام آدمی کو یہ احساس ہوا ہے کہ ریاست ماں کے جیسی ہوتی ہے، جو اپنے شہریوں کے سر پر سایہ بن کر کھڑی ہے۔