لیہ: ٹریفک قوانین آگاہی مہم کے تحت قانون پر عمل داری اور عوامی خدمت ساتھ ساتھ کے سلوگن پر عمل کرتے ہوئے ٹریفک پولیس لیہ کی جانب سے موٹر سائیکل سوار شہریوں میں مفت ہیلمٹ تقسیم کرنے کا سلسلہ جاری ہے۔
ڈی پی او لیہ حسن جاوید بھٹی نے گورنمنٹ کالج یونیورسٹی لیہ کے طلباء میں مفت ہیلمٹ تقسیم کیے۔ اس موقع پر یونیورسٹی میں ٹریفک آگاہی سیمینار کا بھی انعقاد کیا گیا جس میں ڈی پی او حسن جاوید بھٹی، ڈی ایس پی ٹریفک ظفر اقبال اور یونیورسٹی کے پرنسپل نے طلباء سے خطاب کیا۔
ڈی پی او حسن جاوید بھٹی نے خطاب کرتے ہوئے کہا کہ لیہ پولیس شہریوں کی محفوظ سفری ضروریات کے پیشِ نظر شاہراہوں پر بہتر ماحول کی فراہمی کے لیے بھرپور اقدامات کر رہی ہے۔ انہوں نے کہا کہ شہری ٹریفک قوانین پر عمل پیرا ہو کر ایک ذمہ دار شہری ہونے کا ثبوت دیں اور اپنی و دوسروں کی زندگیوں کو محفوظ بنائیں۔
بعد ازاں ڈی پی او لیہ حسن جاوید بھٹی نے ڈی ایس پی ٹریفک ظفر اقبال اور دیگر پولیس افسران کے ہمراہ لیہ مائنر سمیت مختلف مقامات پر موٹر سائیکل سوار شہریوں میں بھی مفت ہیلمٹ تقسیم کیے۔
