لیہ: کمشنر ڈیرہ غازی خان ڈویژن اشفاق احمد چوہدری نے لیہ کا ایک روزہ دورہ کیا، جس دوران انہوں نے مختلف سرکاری اداروں میں جاری سہولیات اور انتظامات کا تفصیلی جائزہ لیا۔ اس موقع پر ڈپٹی کمشنر لیہ آصف علی ڈوگر، ایڈیشنل کمشنرز شاہد ملک، شبیر احمد ڈوگر، اسسٹنٹ کمشنر حارث حمید خان، سی ای او ہیلتھ ڈاکٹر شاہد ریاض اور ایم ایس ڈی ایچ کیو ہسپتال ڈاکٹر غلام محی الدین بھی موجود تھے۔
ڈی ایچ کیو ہسپتال کا دورہ
کمشنر اشفاق احمد چوہدری اچانک ڈی ایچ کیو ہسپتال لیہ پہنچے اور ایمرجنسی وارڈ، صحت کارڈ سینٹر اور ڈائیلاسز یونٹ کا معائنہ کیا۔ انہوں نے وہیل چیئر پر آئے مریض کی خیریت دریافت کی اور علاج معالجے سے متعلق تسلی کی۔
کمشنر نے مریض سے دریافت کیا کہ آیا اسے ہسپتال سے مفت ادویات فراہم کی گئی ہیں، جس پر مریض نے اطمینان کا اظہار کرتے ہوئے کہا کہ ادویات دستیاب ہیں۔ کمشنر نے ایم ایس کو ہدایت کی کہ ہسپتال کی ریویمپنگ جلد مکمل کی جائے جبکہ پارکنگ شیڈ، صفائی، تزئین و آرائش اور دیگر سہولیات کے معیار کو مزید بہتر بنایا جائے۔
میڈیا سے گفتگو کرتے ہوئے کمشنر نے بتایا کہ ڈی ایچ کیو ہسپتال کی مجموعی صورتحال تسلی بخش ہے، ضروری ادویات دستیاب ہیں اور مریض بھی مطمئن نظر آئے۔
انہوں نے کہا کہ وزیر اعلیٰ پنجاب مریم نواز شریف کے وژن صحت مند پنجاب کے تحت ڈویژن میں بہترین طبی سہولیات اور مفت ادویات کی فراہمی کے لیے موثر اقدامات کیے جا رہے ہیں۔
ماڈل ریڑھی بازار کا معائنہ
کمشنر ڈی جی خان نے ماڈل ریڑھی بازار لیہ کا بھی دورہ کیا اور پھلوں و سبزیوں کی کوالٹی، قیمتوں اور مجموعی انتظامات کا جائزہ لیا۔
اراضی ریکارڈ سینٹر لیہ کا دورہ
بعد ازاں کمشنر نے اراضی ریکارڈ سینٹر لیہ کا دورہ کیا اور مختلف کاؤنٹرز پر سروسز کی فراہمی کا معائنہ کیا۔ انہوں نے ایک خاتون سے ان کے مسئلے کے بارے میں دریافت کیا اور سنٹر میں دستیاب سہولیات کے بارے میں سوالات کیے۔
کمشنر نے متعلقہ افسران کو ہدایت کی کہ عوامی سہولیات میں بہتری اور شہریوں کے مسائل کے فوری حل کو یقینی بنایا جائے۔
