ضلعی انجمن صحافیان لیہ کی ضلعی عہدےداران کا اہم اجلاس منعقد ہوا جس کی صدارت صدر انجمن صحافیان ملک فیض بھلر نے کی، جبکہ جنرل سیکرٹری محمد کامران تھند نے اجلاس کے ایجنڈے پر تفصیلی بریفنگ دی۔
اجلاس میں متفقہ طور پر یہ فیصلہ کیا گیا کہ ضلعی سطح پر صحافیوں کی فلاح و بہبود کے لیے تنظیم کو مزید متحرک اور مؤثر بنایا جائے گا، بالخصوص مضافاتی علاقوں سے تعلق رکھنے والے صحافیوں کے مسائل کو ترجیحی بنیادوں پر حل کیا جائے گا۔ اس کے ساتھ ساتھ ضلعی دفتر کے قیام کی منظوری بھی دی گئی تاکہ تنظیمی امور کو بہتر انداز میں چلایا جا سکے۔ مزید برآں، عوامی مسائل کے حل کے لیے ضلع بھر کے صحافیوں کو ایک پلیٹ فارم پر متحد کرنے پر زور دیا گیا۔
اس موقع پر صدر انجمن صحافیان ملک فیض بھلر نے اپنے خطاب میں کہا کہ صحافی معاشرے کی آنکھ اور کان ہوتے ہیں، اور ان کے مسائل کا حل تنظیم کی اولین ترجیح ہے۔ انہوں نے کہا کہ انجمن صحافیان لیہ کو ایک مضبوط، فعال اور باوقار پلیٹ فارم بنایا جائے گا جہاں ہر صحافی کی آواز سنی جائے گی۔ ان کا مزید کہنا تھا کہ مضافاتی صحافیوں کو درپیش مشکلات کے ازالے کے لیے عملی اقدامات کیے جائیں گے اور تنظیم ہر سطح پر اپنے ممبران کے حقوق کے تحفظ کے لیے کردار ادا کرے گی۔
اجلاس میں سینئر نائب صدر جمیل احمد ڈونہ، جوائنٹ سیکرٹری اسماعیل میرانی اور ایڈیشنل سیکرٹری عدنان ارائیں نے بھی شرکت کی اور تنظیمی امور کو مزید بہتر بنانے کے لیے اپنی آراء پیش کیں۔
