وزیراعلیٰ پنجاب محترمہ مریم نواز شریف کے ویژن “محفوظ پنجاب” کے تحت، ایم ڈی پنجاب سیف سٹی اتھارٹی احسن یونس اور ان کی ٹیم کی کاوشوں سے سیف سٹی کا جدید نظام آج سے ضلع لیہ میں فعال ہو چکا ہے۔اس موقع پر ایس ایس پی آپریشنز سیف سٹی ڈی جی خان ریجن ایس پی محمد اجمل اور منیجر سیف سٹی لیہ عبد الاحد موجود تھے۔ ریجنل آفیسر سیف سٹی ڈی جی خان نے میڈیا کو بریفنگ دیتے ہوئے بتایا کہ لیہ میں سیف سٹی منصوبے کے تحت 46 مقامات پر 195 کیمرے نصب کیے گئے ہیں۔ ان میں سے 15 مقامات ضلع اور شہر کے داخلی و خارجی راستوں کو کور کرتے ہیں، جبکہ شہر کے اندر 31 مقامات پر کیمرے نصب کیے گئے ہیں جو ٹریفک کی روانی بہتر بنانے اور جرائم کی روک تھام میں مدد فراہم کریں گے۔مزید برآں، شہر کے مختلف مقامات پر فیشل ریکگنیشن کیمرے نصب کیے گئے ہیں، جو جدید سیکیورٹی نگرانی میں اہم کردار ادا کریں گے۔ای چالاننگ سسٹم کے تحت بھی کیمرے نصب کیے گئے ہیں جو ٹریفک رولز کے نفاذ، خلاف ورزیوں کی نگرانی اور ٹریفک قوانین کی خلاف ورزیوں کو خودکار طریقے سے ریکارڈ کرنے میں مدد فراہم کریں گے۔اس کے علاوہ شہریوں کی سہولت کے لیے مختلف اہم مقامات پر فری وائی فائی پوائنٹس فراہم کیے گئے ہیں، جبکہ ہنگامی صورتحال میں فوری مدد کے لیے پینک بٹن بھی نصب کیے گئے ہیں، جو ایمرجنسی لائنز سے منسلک ہوں گے۔ریجنل آفیسر سیف سٹی ڈی جی خان کے مطابق یہ منصوبہ لیہ کے شہریوں کے لیے نہایت اہمیت کا حامل ہے، جو نہ صرف جرائم کے کنٹرول میں معاون ثابت ہوگا بلکہ معاشی ترقی میں بھی اہم کردار ادا کرے گا۔ضلعی انجمن صحافیان اور ڈسٹرکٹ پریس کلب لیہ کے ممبران و مقافاتی پریس کلبز کے صدور و جنرل سیکرٹری بھی موجود تھے۔