بنیان المرصوص معرکۂ حق کی تاریخی کامیابی کو ایک سال مکمل ہونے پر ملک بھر کی طرح پنجاب اسلامیہ پبلک ہائی سکول ایمپلائیز کالونی لیہ میں بھی پُروقار تقریب کا انعقاد کیا گیا۔ تقریب میں طلباء و طالبات نے وطنِ عزیز، پاک فوج اور معرکۂ حق کی کامیابی کے حوالے سے تقاریر پیش کیں جبکہ پاکستان اور پاک فوج کے حق میں فلک شگاف نعرے لگائے گئے۔تقریب کے دوران سکول ہال “پاک فوج زندہ باد” اور “عاصم منیر ہم تمہارے ساتھ ہیں” کے نعروں سے گونج اٹھا۔ طلباء نے ہاتھوں میں پاک فوج سے اظہارِ یکجہتی اور حب الوطنی پر مبنی پلے کارڈز اٹھا رکھے تھے۔ادارے کے سربراہ محمد شفیق تھند نے اپنے خطاب میں پاک فوج کی جرات، بہادری اور پیشہ ورانہ صلاحیتوں کو خراجِ تحسین پیش کرتے ہوئے کہا کہ ایک سال قبل بھارتی جارحیت کے جواب میں پاک فضائیہ کے شاہینوں کی جانب سے دشمن کے چھ طیارے مار گرانا ایک عظیم اور تاریخی کامیابی تھی، جس پر پوری قوم کو فخر ہے۔انہوں نے کہا کہ نئی نسل میں حب الوطنی، قومی یکجہتی اور افواجِ پاکستان سے محبت کا جذبہ اجاگر کرنا وقت کی اہم ضرورت ہے۔ اس موقع پر اساتذہ نے بھی طلباء کو وطن سے محبت، قومی سلامتی اور پاک فوج کے کردار کے حوالے سے خصوصی لیکچرز دیے۔