حکومتِ پنجاب نے پنجاب ایجوکیشن فاونڈیشن کے تعاون سے ضلع لیہ میں جدید تعلیمی منصوبے “نواز شریف سکول آف ایمینینس” کے قیام کے لیے درخواستیں طلب کر لی ہیں۔ اس منصوبے کے تحت تحصیل چوبارہ میں گرلز اور بوائز کیمپس جبکہ تحصیل کروڑ لعل عیسن میں ایک کیمپس قائم کیا جائے گا۔ درخواستیں جمع کرانے کی آخری تاریخ 15 جون مقرر کی گئی ہے جبکہ درخواست دہندگان کو ٹی او آرز بھی جاری کر دیے گئے ہیں۔

ٹی او آرز کے مطابق میونسپل کمیٹی کی حدود میں کم از کم چار کنال رقبے پر مشتمل 20 کمروں کی عمارت کا موجود ہونا لازمی قرار دیا گیا ہے، جبکہ دیہی علاقوں میں چھ کنال رقبہ درکار ہوگا۔ منتخب ادارے میں جدید تعلیمی سہولیات کے تحت فزکس، کیمسٹری، بیالوجی، کمپیوٹر، روبوٹکس اور ای سی لیبز کا قیام بھی لازم ہوگا۔

حکومتِ پنجاب ، پنجاب ایجوکیشن فاونڈیشن کے ذریعے فی طالب علم تعلیمی اخراجات کی مد میں فیس ادا کرے گی، جس کا مکمل طریقہ کار واضح کر دیا گیا ہے۔ دلچسپی رکھنے والے افراد و ادارے مزید معلومات اور درخواست کے لیے پنجاب ایجوکیشن فاؤنڈیشن کی ویب سائٹ سے رابطہ کر سکتے ہیں۔

واضح رہے کہ تحصیل لیہ میں تین کیمپس اورتحصیل کروڑ میں ایک کیمپس پہلے نواز شریف سکول آف ایمینینس کے دئیے جا چکے ہیں جن میں داخلے جاری ہیں