لیہ، 13 اگست 2025ء (نمائندہ خصوصی) — ملک بھر کی طرح ضلع لیہ میں بھی "معرکۂ حق: حصولِ آزادی سے تحفظِ آزادی تک” کے عنوان سے 14 روزہ جشنِ آزادی تقریبات عروج پر پہنچ چکی ہیں۔ اسی سلسلے کا پہلا میگا ایونٹ ڈی پی ایس گرلز ونگ لیہ میں شاندار انداز میں منعقد کیا گیا، جس میں ننھے طلبہ و طالبات نے قومی جذبے اور حب الوطنی سے لبریز پرفارمنسز پیش کیں۔
تقریب کی مہمانِ خصوصی ڈپٹی کمشنر امیرا بیدار تھیں، جنہوں نے بچوں کے ہمراہ بیٹھ کر ان کی پیش کردہ ہیومن فلیگ اور ملی نغموں پر ٹیبلوز کو سراہا۔ اس موقع پر ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنر لیہ حارث حمید خان، پرنسپل ڈی پی ایس گرلز ونگ طاہرہ ذوالفقار، اساتذہ اور والدین کی بڑی تعداد شریک تھی۔
بچوں نے ملی نغمے "جیوے جیوے پاکستان” پر والہانہ پرفارمنس پیش کر کے خوب داد سمیٹی، جبکہ معرکۂ حق کے عنوان سے آرٹ مقابلے میں تیار کی گئی پینٹنگز نے حاضرین کو بے حد متاثر کیا۔
ڈپٹی کمشنر امیرا بیدار نے بچوں کی پینٹنگز کا معائنہ کیا اور کہا:
"وطن کی مٹی سے محبت ایک فطری جذبہ ہے، اور یہ جذبہ بچوں کی تخلیقات اور پرفارمنسز میں بھرپور جھلکتا ہے۔ ہم ان بچوں کو سلام پیش کرتے ہیں جو اپنے فن کے ذریعے آزادی کے ہیروز کو خراجِ عقیدت پیش کر رہے ہیں۔”
تقریب کے اختتام پر پینٹنگ اور ٹیبلو مقابلوں میں نمایاں کارکردگی دکھانے والی طالبات میں تعریفی اسناد تقسیم کی گئیں۔
ایڈیشنل ڈپٹی کمشنر جنرل شبیر احمد ڈوگر نے بھی تقریب سے خطاب کرتے ہوئے کہا:
"معرکۂ حق جشنِ آزادی کی یہ تقریب بچوں کے وطن سے والہانہ عشق اور مضبوط مستقبل کی نوید ہے۔ ہمیں قائداعظم کے اصولوں کو مشعلِ راہ بنا کر پاکستان کو ترقی کی راہ پر گامزن رکھنا ہوگا۔”
تقریب میں پیش کیے گئے چاروں صوبوں کی ثقافت پر مبنی ٹیبلوز نے قومی یکجہتی اور تنوع میں اتحاد کا پیغام بھی دیا
