اسلام آباد، 16 اگست (اے پی پی) — وزیراعظم محمد شہباز شریف نے کہا ہے کہ جناح میڈیکل کمپلیکس اسلام آباد کے لیے چینی کمپنی کی جانب سے بغیر کسی معاوضے کے عالمی معیار کا کنسیپٹ ڈیزائن تیار کرنا پاک چین دوستی اور عوامی روابط کی مضبوطی کا منہ بولتا ثبوت ہے۔
وزیراعظم آفس کے میڈیا ونگ کے مطابق ہفتہ کو وزیراعظم کی زیر صدارت جناح میڈیکل کمپلیکس اور ریسرچ سینٹر پر جائزہ اجلاس منعقد ہوا جس میں چینی کمپنی ہانگ کانگ آوہوا کی جانب سے تیار کردہ ڈیزائن پیش کیا گیا۔ کمپنی گزشتہ 30 برسوں میں ایک ہزار سے زائد اسپتالوں کے ڈیزائن کا تجربہ رکھتی ہے۔
وزیراعظم نے چینی کمپنی کے اقدام کو خراجِ تحسین پیش کرتے ہوئے کہا کہ:
"یہ تحفہ نہ صرف حکومت بلکہ پاکستانی عوام اور مستقبل میں اس ہسپتال سے شفایاب ہونے والے افراد ہمیشہ یاد رکھیں گے۔”
اجلاس میں اہم ہدایات
- ڈیزائن کا ٹیکنیکل جائزہ اور فزیبلٹی رپورٹ تیار کی جائے۔
- کمپلیکس میں ڈیجیٹائزیشن اور مصنوعی ذہانت (AI) کے اطلاق کو یقینی بنایا جائے۔
- ڈیزائن میں وبائی امراض سے نمٹنے کے لیے ہنگامی منصوبہ بندی خوش آئند ہے۔
- منصوبے میں ماحولیات کا تحفظ، پانی کی بچت، وسائل کے بہتر استعمال کو شامل کیا جائے۔
- شمسی توانائی، قدرتی روشنی، پانی کی ری سائیکلنگ اور سبز ماحول کے اقدامات قابلِ اطمینان ہیں۔
- جناح میڈیکل کمپلیکس کو اسلام آباد کے دیگر اسپتالوں سے ڈیجیٹل لنک کیا جائے۔
- تعمیراتی کام معینہ مدت میں مکمل کیا جائے۔
اجلاس میں وفاقی وزراء احسن اقبال، احد خان چیمہ، شزہ فاطمہ خواجہ، وزیرِ مملکت برائے صحت مختار احمد بھرتھ، وزیراعظم کے کوآرڈینیٹر مشرف زیدی، چیئرمین پاکستان کڈنی اینڈ لیور انسٹیٹیوٹ پروفیسر ڈاکٹر سعید اختر، چینی کمپنی کے سی ای او ڈاکٹر لیو ڑانپئے اور اعلیٰ حکام شریک ہوئے۔
