کوٹ سلطان میں پریس کلب کے زیرِ اہتمام ولادتِ باسعادت ﷺ کے بابرکت مہینے کی مناسبت سے ایک روح پرور نعتیہ محفل کا انعقاد ہوا جس میں سرکاری و نجی تعلیمی اداروں کے 137 طلبا و طالبات نے شرکت کی۔ طلبہ نے نہایت عقیدت و محبت کے ساتھ نعتیں پیش کیں جنہیں حاضرین نے دل کھول کر سراہا۔ پوزیشن ہولڈرز کو کیش انعامات، ٹرافیاں اور سرٹیفکیٹس دیے گئے، جس سے طلبہ کے چہروں پر خوشی دیدنی تھی۔

اس موقع پر اسسٹنٹ کمشنر حارث حمید خان نے خطاب کرتے ہوئے کہا کہ ربیع الاول کا مہینہ اُمتِ مسلمہ کے لیے خوشیوں اور برکتوں کا پیغام ہے۔ یہ مہینہ ہمیں اطاعتِ رسول ﷺ، محبت، اخوت اور بھائی چارے کا درس دیتا ہے۔ ان کا کہنا تھا کہ نعتیہ محفلیں صرف ایمان کو تازگی نہیں بخشتی بلکہ نوجوان نسل کو سیرتِ طیبہ ﷺ کی طرف متوجہ کرنے کا بہترین ذریعہ ہیں۔

انہوں نے کہا کہ اگر ہماری نوجوان نسل حضور ﷺ کی تعلیمات کو اپنی زندگی کا مشعلِ راہ بنا لے تو ہمارا معاشرہ حقیقی معنوں میں امن، محبت اور اخوت کا گہوارہ بن سکتا ہے۔ "دنیا اور آخرت کی کامیابی کا واحد راستہ حضور اکرم ﷺ کی سیرت اور تعلیمات پر عمل پیرا ہونا ہے،” اسسٹنٹ کمشنر نے زور دیتے ہوئے کہا۔

تقریب میں چیف ایگزیکٹو آفیسر تعلیم ڈاکٹر محمد قیوم خان، ڈپٹی ڈائریکٹر ڈویلپمنٹ اسحاق کھیرانی، میڈیا نمائندگان اور معزز شہری بڑی تعداد میں شریک ہوئے۔ تقریب کے اختتام پر شرکا نے دعا کی کہ اللہ پاک ہمیں سیرتِ طیبہ ﷺ پر چلنے کی توفیق عطا فرمائے۔