لیہ میں عید میلادالنبی ﷺ کے حوالے سے تیاریاں زور و شور سے جاری ہیں۔ ڈپٹی کمشنر امیرابیدار نے کہا ہے کہ اس بابرکت موقع پر بہترین میونسپل سروسز اور فول پروف سکیورٹی انتظامات یقینی بنائے جا رہے ہیں تاکہ عوام مکمل سکون اور تحفظ کے ساتھ جشنِ میلاد میں شریک ہو سکیں۔
انہوں نے بتایا کہ شہر کی شاہراہوں، چوکوں اور اہم عمارتوں کو دلکش چراغاں سے مزین کیا جائے گا جبکہ ٹریفک اور پارکنگ کے لیے ایک جامع پلان پر سختی سے عمل درآمد کیا جائے گا۔ ڈپٹی کمشنر نے یہ بات ڈسٹرکٹ میلاد کمیٹی کے اجلاس کی صدارت کرتے ہوئے کہی جس میں ایڈیشنل ڈپٹی کمشنر ریونیو شاہد ملک، اسسٹنٹ کمشنر لیہ حارث حمید خان، ڈی ایس پی ہیڈ کوارٹر امتیاز احمد، شیخ اشرف چشتی، حاجی احمد بخش، محمد انور سعید اور عطاء الرحمن سمیت دیگر ممبران شریک تھے۔
اجلاس میں فیصلہ کیا گیا کہ میلاد گراؤنڈ میں مرکزی تقریب کے تمام انتظامات مکمل کیے جائیں گے اور شہر کے داخلی راستوں پر خوبصورت استقبالیہ گیٹ تیار کیے جائیں گے۔ ڈپٹی کمشنر نے مزید بتایا کہ حکومت پنجاب کی ہدایات کے مطابق تعلیمی اداروں میں جشن آمد رسول ﷺ کے سلسلے میں نعت خوانی، قرأت اور تقریری مقابلے جاری ہیں۔
اسی طرح بارہ ربیع الاول کے دن اسپتالوں، جیلوں اور دارالامان میں مقیم خواتین و بچوں میں شیرینی تقسیم کی جائے گی تاکہ ہر فرد خوشی و مسرت کے ان لمحات میں شریک ہو سکے۔ ڈپٹی کمشنر نے کہا کہ عید میلادالنبی ﷺ کو شایانِ شان طریقے سے منانا ہماری سعادت ہے اور حضور اکرم ﷺ کی تعلیمات پر عمل پیرا ہونا ہی امن، محبت، بھائی چارے اور مساوات کو فروغ دینے کا بہترین ذریعہ ہے۔
