وفاقی وزیر و چیئرمین پارلیمانی کمیٹی آن کشمیر رانا محمد قاسم نون کا سیلاب متاثرہ علاقوں کا دورہ
وفاقی وزیر اور چیئرمین پارلیمانی کمیٹی آن کشمیر رانا محمد قاسم نون نے ہفتہ کو تحصیل جلالپور پیر والا (ملتان) میں سیلاب متاثرہ علاقوں کا دورہ کیا اور متاثرہ شہریوں سے ملاقات کی۔
رانا محمد قاسم نون نے کہا کہ مودی سرکار کی حالیہ آبی جارحیت انتہائی قابلِ مذمت ہے، جس کے نتیجے میں دریائے چناب، ستلج اور راوی میں پانی کی سطح میں خطرناک حد تک اضافہ ہوا ہے اور سیلابی صورتحال پیدا ہو گئی ہے۔ انہوں نے واضح کیا کہ جلالپور پیر والا ایک جانب دریائے چناب اور دوسری طرف دریائے ستلج کے درمیان گھرا ہوا ہے، جس سے صورتحال مزید تشویشناک ہو چکی ہے۔
انہوں نے شہریوں پر زور دیا کہ وہ احتیاطی تدابیر اختیار کریں اور انتظامیہ کے ساتھ مکمل تعاون کریں۔ رانا قاسم نون نے کہا کہ جو لوگ ابھی تک سیلاب زدہ علاقوں سے انخلا نہیں کر سکے، وہ فوری طور پر محفوظ مقامات پر منتقل ہو جائیں تاکہ کسی بڑے نقصان سے بچا جا سکے۔
وفاقی وزیر نے بتایا کہ تحصیل بھر کے تمام اسکولوں میں ریلیف کیمپ قائم کر دیے گئے ہیں جہاں متاثرہ خاندانوں کو بنیادی سہولیات فراہم کی جا رہی ہیں۔ محکمہ لائیو اسٹاک کی ٹیمیں بھی فیلڈ میں موجود ہیں جو مویشیوں کی دیکھ بھال کے ساتھ ساتھ ریلیف سرگرمیوں میں بھرپور کردار ادا کر رہی ہیں۔
بعدازاں رانا محمد قاسم نون نے مختلف فلڈ ریلیف کیمپس کا معائنہ کیا اور جاری امدادی سرگرمیوں کا جائزہ لیا۔ ان کا کہنا تھا کہ حکومت پاکستان متاثرہ عوام کے ساتھ کھڑی ہے اور کسی کو اس مشکل گھڑی میں تنہا نہیں چھوڑا جائے گا۔
