لیہ:
ڈپٹی کمشنر امیرا بیدار کی زیر صدارت انسداد پولیو مہم کے انتظامات کا جائزہ اجلاس منعقد ہوا۔ اجلاس میں ایڈیشنل ڈپٹی کمشنرز شاہد ملک، شبیر احمد ڈوگر، اسسٹنٹ کمشنر حارث حمید خان، سی ای او ہیلتھ ڈاکٹر شاہد ریاض، ایم ایس ڈی ایچ کیو اسپتال ڈاکٹر غلام محی الدین، ڈاکٹر محمد یونس کلیہ، ڈی ای او گل شیر، انچارج سیکورٹی برانچ محمد یاسر گورمانی،محمد شفیق تھند صدر فیڈریشن آف پرائیویٹ اسکولز نے شرکت کی۔ڈبلیو ایچ او حکام اور دیگر افسران شریک ہوئے۔

اجلاس سے خطاب کرتے ہوئے ڈپٹی کمشنر امیرا بیدار نے بتایا کہ ضلع بھر میں انسداد پولیو کی چار روزہ مہم 13 تا 16 اکتوبر جاری رہے گی، جس میں پانچ سال تک کی عمر کے 4 لاکھ سے زائد بچوں کو پولیو ویکسین پلائی جائے گی۔ اس دوران بچوں کو وٹامن اے کی خوراک بھی دی جائے گی تاکہ ان کی قوت مدافعت بہتر بنائی جا سکے۔

ڈپٹی کمشنر نے ہدایت کی کہ تمام متعلقہ محکمے مہم کی کامیابی کے لیے اپنا بھرپور کردار ادا کریں۔ انہوں نے اسسٹنٹ کمشنرز کو ہدایت کی کہ وہ اپنی تحصیلوں میں پولیو ٹیموں کی ٹریننگ اور انتظامات کا خود جائزہ لیں۔ انہوں نے واضح کیا کہ ناقص کارکردگی دکھانے والے افسران و عملے کے خلاف کارروائی عمل میں لائی جائے گی۔

امیرا بیدار نے کہا کہ عوام میں آگاہی کے لیے بھرپور مہم چلائی جائے تاکہ کوئی بھی بچہ پولیو ویکسین سے محروم نہ رہے۔ انہوں نے زور دیا کہ کچے کے علاقے، تھل، خانہ بدوشوں کے بچے اور ضلع کے داخلی و خارجی راستے خصوصی توجہ کا مرکز ہونے چاہئیں تاکہ مہم کو کامیابی سے ہمکنار کیا جا سکے۔

سی ای او ہیلتھ ڈاکٹر شاہد ریاض نے اجلاس کو بتایا کہ انسداد پولیو مہم کے لیے ضلع میں 1797 ٹیمیں تشکیل دی گئی ہیں جبکہ 58 ٹرانزٹ پوائنٹس پر خصوصی فوکس کیا جائے گا تاکہ آنے جانے والے بچوں کو بھی ویکسین پلائی جا سکے۔

ڈپٹی کمشنر نے آخر میں کہا کہ پولیو ایک موذی مرض ہے اور اسے ختم کرنے کے لیے اجتماعی کوششوں اور لگن کی ضرورت ہے۔ ضلع لیہ کو پولیو فری اعزاز دلانے کے لیے ہر سطح پر سنجیدہ اقدامات کیے جائیں گے۔